کراچی کے سرکاری سکول میں 13 سالہ بچے کے قتل کی کوشش، تشدد کے بعد گلے میں پھندا لگا دیا

کراچی کے علاقے سعود آباد کے سرکاری اسکول میں بچے کو قتل کرنے کی کوشش کی گئی۔

تیرہ سالہ معیز کو نامعلوم افراد نے بد ترین تشدد کے بعد گلے میں پھندہ لگایا، اسپتال میں بچہ تاحال بے ہوشی کی حالت میں ہے۔

پولیس نے بچے کے والد غلام حیدر کی مدعیت میں اقدام قتل کا مقدمہ درج کر کے ملزمان کی تلاش شروع کردی۔

والد کے مطابق بچہ تین اپریل کو اپنے دوستوں کو کرکٹ بیٹ دینے گیا، کافی دیر واپس نہ آنے پر معیز کی تلاش شروع کی، چار گھنٹے بعد اطلاع ملی کہ بیٹا سرکاری اسکول کے میدان میں بے ہوش پڑا ہے۔

والد کے مطابق اسکول پہنچا تو پولیس بچے کو اسپتال منتقل کرچکی تھی، پولیس کے مطابق بچہ تاحال بے ہوش ہے، ہوش میں آنے پر ہی بیان لیا جاسکے گا۔

اسکول کے چوکیدار نے پولیس کو بتایا کہ اسکول کے میدان میں بچوں کا رش دیکھ کر پتہ کیا تو بچہ بیہوش پڑا تھا، بچے کو ہوش میں لانے کی کوشش کی،ہوش میں نہ آنے پر پولیس کو مطلع کیا۔

تیرہ سالہ معیز چھ بہن بھائیوں میں سب سے چھوٹا ہے۔