الیکشن کمیشن کو عام انتخابات کے لیے مزید 17 ارب 40 کروڑ روپے جاری کر دیئے گئے

الیکشن کمیشن آف پاکستان کو 17 ارب اور 40 کروڑ روپے جاری کردئیے گئے۔

وزارت خزانہ کے مطابق یہ رقم ملک میں عام انتخابات کے انعقاد کے لیے فراہم کی گئی ہے،،الیکشن کمیشن کو جولائی 2023 میں 10 ارب روپےجاری کیے گئے۔

الیکشن کمیشن کو اب تک انتخابات کے لئے مجموعی طور پر 27 ارب روپے سے زائد رقم جاری کی جاچکی ہے۔

وزارت خزانہ کا کہنا ہے کہ الیکشن کمیشن آف پاکستان کو ضرورت کے مطابق فنڈز کی فراہمی کے لیے پرعزم ہیں۔

الیکشن کمیشن نے گزشتہ روز فنڈز فراہم نہ کرنے پر سیکرٹری وزارت خزانہ کو طلب کیا تھا۔

سیکرٹری وزارت خزانہ نے سیکرٹری الیکشن کمیشن کو ملاقات میں فنڈز فراہمی کی یقین دہانی کرائی تھی۔