امریکا کے کسی بھی حملے کا فیصلہ کن جواب دیا جائے گا، ایران

 ایرانی پاسداران انقلاب کے سربراہ حسین سلامی نے بدھ کے روز کہا ہے کہ ایران امریکہ کی طرف سے کسی بھی خطرے کا جواب دے گا۔

واشنگٹن تہران سے منسلک عسکریت پسندوں کے ہاتھوں امریکی فوجیوں کی ہلاکت پر اپنے ردعمل پر غور کر رہا ہے۔

نیم سرکاری خبر رساں ادارے تسنیم کے مطابق، جنرل حسین سلامی نے کہا، "ہمیں امریکی حکام کی طرف سے دھمکیاں آتی ہیں، ہم انہیں بتاتے ہیں کہ وہ پہلے ہی ہمیں آزما چکے ہیں اور اب ہم ایک دوسرے کو جانتے ہیں، کسی بھی دھمکی کا جواب دیا جائے گا۔”

جنوری 2020 میں، انقلابی گارڈز نے بغداد میں امریکی ڈرون حملے کے بعد عراق میں عین الاسد امریکی اڈے کو نشانہ بنایا تھا، امریکی ڈرون حملے میں ایران کے پاسداران انقلاب کی قدس فورس کے کمانڈر قاسم سلیمانی کی ہلاکت ہوئی تھی۔

اقوام متحدہ میں ایران کے ایلچی امیر سعید ایرانی نے بدھ کے روز خبردار کیا کہ تہران اپنی سرزمین، اپنے مفادات یا اپنی سرحدوں سے باہر ایرانی شہریوں پر کسی بھی حملے کا فیصلہ کن جواب دے گا۔

ایرانی حکام کی طرف سے یہ بیانات امریکی صدر جو بائیڈن کے اعلان کے ایک دن بعد سامنے آئے ہیں جب انہوں نے کہا کہ انہوں نے فیصلہ کر لیا ہے کہ ایران سے منسلک عراقی گروپوں کے ڈرون حملے کا جواب کیسے دیا جائے۔

شام میں اسرائیلی حملوں کے بعد کئی ایرانی پاسداران انقلاب ہلاک ہو چکے ہیں، جن کے پانچ ارکان 20 جنوری کو اور دو دیگر 25 دسمبر کو مارے گئے۔