آرمی چیف جنرل عاصم منیر سے چین کی گراؤنڈ فورسز کے سربراہ کی ملاقات،علاقائی سلامتی، فوجی تربیت اور دفاعی تعاون کو مزید بڑھانے کے اقدامات پر بات چیت

آرمی چیف جنرل سید عاصم منیر سے چین کی بری فوج کے سربراہ نے ملاقات کی، باہمی دلچسپی کے امور ،علاقائی سلامتی اوردفاعی تعاون پرتبادلہ خیال کیا۔
آئی ایس پی آر کےمطابق چین کی بری فوج کے سربراہ نےدہشتگردی کیخلاف جنگ میں پاکستان کی کوششوں کوسراہا اور پاک فوج کی پیشہ ورانہ مہارت کی تعریف کی۔

آرمی چیف نے پاک فوج اور پیپلز لبریشن آرمی کے درمیان مضبوط تعلقات پر زوردیا۔معزز مہمان نے یادگار شہدا پر پھول چڑھائے۔

پاک فوج کے شعبہ تعلقات عامہ ( آئی ایس پی آر) کے مطابق چین کی پیپلز لبریشن آرمی گراؤنڈ فورسز کے کمانڈر جنرل لی کیاومنگ نے آج جی ایچ کیو راولپنڈی میں چیف آف آرمی سٹاف جنرل سید عاصم منیر سے ملاقات کی۔
ملاقات میں باہمی دلچسپی کے امور، علاقائی سلامتی، فوجی تربیت اور دوطرفہ دفاعی تعاون کو مزید بڑھانے کے اقدامات پر گہرائی سے بات چیت کا موقع ملا۔

سی او ایس جنرل سید عاصم منیر نے پاک فوج اور پیپلز لبریشن آرمی کے درمیان مضبوط تعلقات پر زور دیا، دونوں ممالک کے درمیان پائیدار بھائی چارے کے ثبوت کے طور پر جاری دوطرفہ فوجی تعاون کو اجاگر کیا۔ دورے پر آئے ہوئے معزز مہمان نے پاک فوج کی غیر متزلزل پیشہ ورانہ مہارت اور لگن کو تسلیم کرتے ہوئے دہشت گردی اور انتہا پسندی کے خلاف پاکستان کی مشترکہ کوششوں کی تعریف کی۔

سی او ایس جنرل سید عاصم منیر نے معزز مہمان کا شکریہ ادا کرتے ہوئے اس بات کا اعادہ کیا کہ پاکستان چین کے ساتھ اپنے برادرانہ تعلقات کو دل کی گہرائیوں سے قدر کی نگاہ سے دیکھتا ہے۔

قبل ازیں جنرل ہیڈ کوارٹرز پہنچنے پر جنرل لی کیاومنگ نے یادگار شہدا پر پھولوں کی چادر چڑھا کر خراج عقیدت پیش کیا اور احترام اور مہمان نوازی کا مظاہرہ کرے ہوئے پاک فوج کے چاق و چوبند دستے نے انہیں گارڈ آف آنر پیش کیا۔۔