پرویز الٰہی کی گرفتاری، چیف کمشنر اسلام آباد کو توہین عدالت کا نوٹس

لاہور ہائیکورٹ نے سابق وزیر اعلی پنجاب پرویز الہی کی بازیابی کیلئے درخواست غیر موثر ہونے پر نمٹا دی جبکہ ایک دوسری درخواست پر چیف کمشنر اسلام آباد کو توہین عدالت کے نوٹس جاری کر دیئے۔

لاہور ہائیکورٹ کے جسٹس مزرا وقاص رؤف نے سابق وزیر اعلیٰ کی بازیابی کیلئے اُن کی اہلیہ قیصرہ الہی کی درخواست پر سماعت کی۔

پرویز الہی کو گرفتاری کی وجہ سے پیش نہیں کیا گیا۔ عدالتی استفسار پر ایڈووکیٹ جنرل اسلام آباد نے بتایا کہ آئی جی پولیس اسلام آباد سپریم کورٹ اور چیف کمشنر اسلام آباد ہائیکورٹ میں پیش ہونے کی وجہ سے نہیں آسکے۔

ایڈووکیٹ جنرل اسلام آباد نے بتایا کہ پرویز الہی کو یہاں لانا مشکل ہے، جس پر عدالت نے باور کرایا کہ یہاں سے لیجاتے ہوئے کوئی مشکل نہیں آئی، پرویز الہی کو پیش کرنا کسی انا کا مسئلہ نہیں ہونا چاہیے۔

عدالت نے پرویز الٰہی کی بازیابی کی حد تک درخواست غیر موثر ہونے نمٹا دی اور باور کرایا کہ افسروں کیخلاف توہین عدالت کی کارروائی الگ سے جاری رہے گی۔

عدالت نے ریمارکس دیئے کہ چیف کمشنر اسلام آباد نے اس عدالت کے حکم کی خلاف ورزی کی۔ عدالت نے آرڈر میں مداخلت پر اسلام آباد ایڈووکیٹ جنرل کو روک دیا اور ریمارکس دیئے کہ  جو کہنا ہے وہ اپنے جواب میں کہیں، عدالت نے ہدایت کی کہ سات دنوں میں افسر اپنا جواب داخل کرائیں۔ توہین عدالت کے معاملے پر مزید کارروائی آئندہ ہفتے ہوگی۔