پارک لین اور توشہ خانہ کیسز میں آصف زرداری کو صدارتی استثنا مل گیا

پارک لین اور توشہ خانہ گاڑیوں کے ریفرنس میں صدر آصف زرداری کو صدارتی استثنیٰ مل گیا۔ صدرمملکت کے خلاف کارروائی روک دی گئی۔

احتساب عدالت اسلام آباد کے جج ناصر جاوید رانا نے صدر مملکت آصف زرداری کی نیب کیسز میں صدارتی استثنیٰ کی درخواستوں کا تحریری فیصلہ جاری کردیا۔

فیصلے میں کہا گیا ہے کہ جب تک آصف علی زرداری صدر مملکت ہیں ان کے خلاف کیسز کی کارروائی آگے نہیں بڑھ سکتی،آصف علی زرداری کی جانب سے آئین کے آرٹیکل 248 (2) کے تحت درخواست دائر کی گئی۔

فیصلے میں کہا گیا کہ درخواستوں میں موقف اختیار کیا گیا کہ آصف زرداری جب تک صدر مملکت ہیں کیسز کی کرمنل کارروائی جاری نہیں رہ سکتی،پراسکیوشن کی جانب سے ان درخواستوں پر کوئی بھی اعتراض نہیں کیا گیا اور نہ ہی مخالفت کی گئی،آئین کے آرٹیکل 248 (2) کے تحت صدر مملکت کے خلاف کوئی کیس ہوسکتا ہے اور نا کوئی کارروائی جاری رہ سکتی۔

احتساب عدالت نے قرار دیا کہ صدر مملکت آصف علی زرداری کی کیسز سے صدارتی استثنیٰ حاصل کرنے کی درخواستیں منظور کی جاتی ہیں۔