صوبے کی نمائندگی کے لیے اپیکس کمیٹی اجلاس میں شرکت کی، وزیراعلیٰ کے پی، علی امین نے مکمل تعاون کا یقین دلایا، وفاقی وزیر اطلاعات

وزیراعلیٰ خیبرپختونخوا علی امین گنڈا پور نے کہا ہے کہ صوبے کی نمائندگی کیلئے ایپکس کمیٹی اجلاس میں شرکت کی،صوبے کی عوام کو ریلیف کیلئے آخری حد تک جاؤں گا۔ وفاقی وزیر اطلاعات عطا تارڑ نے کہا کہ وزیراعلیٰ خیبرپختونخوا نے اپنے صوبے کے مسائل بتائے اور مکمل تعاون کی یقین دہانی کرائی ہے،

اسلام آباد میں ایس آئی ایف سی اجلاس کے بعد میڈیا سے گفتگو کرتے ہوئے علی امین گنڈا نے کہا کہ فاٹا اور پاٹا پر ٹیکس لگانا ممکن نہیں ہے،اس وقت کسی بھی قسم کا ٹیکس ہمیں قبول نہیں،صوبے کے شیئرز پر کسی قسم کا سمجھوتہ نہیں کریں گے۔

وزیراعلیٰ خیبرپختونخوا نے کہا کہ صوبے کی نمائندگی کیلئے ایپکس کمیٹی اجلاس میں شرکت کی،ضم شدہ اضلاع میں ٹیکس اس بجٹ میں نہ لگایا جائے،صوبے اور ملک کیلئے جو بھی کردار ہوگا ادا کرینگے،کان کنی کے شعبے میں اصلاحات کرکے آمدنی بڑھاسکتے ہیں،بجلی سے متعلق جو ڈیڈ لائن دی گئی تھی اس پر بات ہوئی ہے۔

علی امین گنڈا پور نے کہا کہ صوبے کی عوام کو ریلیف کیلئے آخری حد تک جاؤں گا،اسلام آباد میں خیبرپختونخوا کی بجلی سے متعلق تھوڑی دیر بعد میٹنگ ہوگی،وفاق سے مطالبہ ہے کہ ہمارے صوبے کے فنڈز فوری ادا کریں،صوبے کے بجٹ کا حجم 11 ہزار ارب کی بنیاد پر رکھا ہے۔

وزیراعلیٰ خیبرپختونخوا نے کہا کہ وفاق کی جانب سے زیادہ فنڈز آتے ہیں تو عوام کو مزید ریلیف دینگے،بانی پی ٹی آئی ہماری پہلی ترجیح ہے، ہم نے جو صوبے کا بجٹ دیا ہے عوام کیلئے درست کیا ہے، بجٹ دے کر کوئی غیر آئینی یا غیر قانونی کام نہیں کیا،خیبرپختونخوا کے واجبات ادا نہیں کیے جاتے تو یہ نا انصافی ہوگی۔

ایس آئی ایف سے اجلاس کے بعد میڈیا سے بات کرتے ہوئے وفاقی وزیر اطلاعات عطا تارڑ نے کہا کہ آج کی میٹنگ اچھے ماحول میں ہوئی،آج کی میٹنگ سے پیغام گیا وفاق اور اکائیوں میں اتحاد ہے،ایس آئی ایف سی میں سرمایہ کاری سے متعلق 6 ڈیسک بنیں گے۔

عطا تارڑ نے کہا کہ ایس آئی ایف سی پر سب کو اعتماد ہے، وزیراعلیٰ خیبرپختونخوا نے مکمل تعاون کی یقین دہانی کرائی ہے،ڈیسک بنانے کے عمل کو چاروں وزرائے اعلیٰ نے سراہا،آج کی میٹنگ تاریخی ہے اس کے اثرات نظر آئیں گے، عطا تارڑ
علی امین گنڈا پور نے کہا وہ ایس آئی ایف سی سے باہر نہیں،اجلاس سے پہلے چاروں وزرائے اعلیٰ کی وزیراعظم سے ملاقات ہوئی۔

عطا تارڑ نے کہا کہ وزیراعلیٰ علی امین گنڈا پور نے اپنے صوبے کی بات کی، مسائل بتائے ،معیشت کے استحکام کیلئے ایس آئی ایف سی لائف لائن ہے۔