آڈیو لیکس کیس: جسٹس بابر ستار نے بینچ پر اعتراض واپس لینے کی آئی بی کی درخواست مسترد کردی

اسلام آباد ہائیکورٹ نے آڈیو لیکس کیس میں جسٹس بابر ستار پر اعتراض واپس لینے کی آئی بی کی درخواست مسترد کردی۔

آڈیو لیکس کیس میں جسٹس بابر ستار پر اعتراض واپس لینے کی آئی بی کی درخواست پر سماعت ہوئی،جسٹس بابر ستار نے آئی بی کی متفرق درخواست پر سماعت کی۔

اسسٹنٹ اٹارنی جنرل نے استدعا کی کہ آئی بی کی آڈیو لیکس میں بینچ پر اعتراض کی درخواست واپس لینا چاہتے ہیں۔

جسٹس بابر ستار نے کہا کہآپ کی اعتراض والی درخواست تو پہلے ہی خارج کی جا چکی ہے،آرڈر آئے گا تو وہ آپ کو مل جائے گا،آرڈر میں ڈی جی آئی بی کو نوٹس کیا ہے کہ کیوں نا ان کے خلاف توہین عدالت کی کارروائی کی جائے، آرڈر میں یہ بھی پوچھا گیا ہے کہ کس نے درخواست دائر کرنے کی اتھارٹی دی تھی،آپ نے جو جواب دینا ہے وہ آرڈر آنے کے بعد دے دیجئے گا۔

عدالت نے آئی بی کی جانب بینچ پر اعتراض واپس لینے کی متفرق درخواست بھی خارج کردی

آئی بی سمیت چار اداروں نے جسٹس بابر ستار پر اعتراض کرتے ہوئے کیس سے الگ ہونے کی درخواستیں دائر کی تھیں،پیمرا، پی ٹی اے اور ایف آئی اے کی درخواستیں عدالت نے پانچ پانچ لاکھ روپے کے جرمانوں کیساتھ خارج کر دی تھیں۔

آئی بی نے دیگر تین اداروں پر 15 لاکھ روپے جرمانے کے بعد اعتراض واپس لینے کی متفرق درخواست دائر کی۔