بشام حملے کا مقصد پاک چین دوستی کو نقصان پہنچانا تھا، وزیراعظم، داسو ڈیم کا دورہ، چینی انجینئرز، ورکرز سے ملاقات

وزیراعظم محمد شہباز شریف نے خیبرپختونخوا کے ضلع کوہستان میں زیرتعمیر داسو ڈیم کا دورہ کیا،وزیراعظم نے چینی باشندوں پر بشام کے مقام پر ہونے والے حالیہ دہشتگرد حملے کے تناظر میں داسو ڈیم منصوبے پر کام کرنے والی چینی کمپنی کے انجینئرز اور ورکرز سےاظہارِ تعزیت کیا۔

وزیراعظم شہبازشریف نے چینی انجینئرز اور ورکرزبات کرتے ہوئے کہا کہ چینی بھائیوں اور بہنوں کے ساتھ اظہار یکجہتی کیلئے داسو کا دورہ کیا ہے،بشام میں دہشت گردی میں چینی شہریوں کی ہلاکت پر اظہار تعزیت کرتا ہوں،26مارچ کو دہشت گردی میں 5 چینی انجینئر اور ایک پاکستانی کی موت ہوئی، دہشت گردی میں معصوم چینی شہریوں اور پاکستانی شہری کو ہلاک کیا گیا۔

وزیراعظم نے کہا کہ بشام واقعہ دہشت گردوں کا بزدلانہ فعل تھا،دہشت گردی کا مقصد پاکستان اور چین کی دوستی کو نقصان پہنچانا تھا،بشام حملے میں پاکستان کے دشمن ملوث ہیں،پاکستان اور چین کی دوستی وقت کے ساتھ مضبوط ہوتی جارہی ہے،چینی انجینئرز پاکستان کی ترقی میں ہاتھ بٹانے کیلئےموجود ہیں،دشمن 2عظیم دوستوں میں خلیج پیدا کرنے کی ناکام کوشش کررہا ہے۔

وزیراعظم نے کہا کہ دکھ کی اس گھڑی میں چینی انجینئرزاورعوام کے غم میں برابرکےشریک ہیں،پاکستان میں کام کرنےوالے چینی باشندوں کو فول پروف سکیورٹی فراہم کی جائےگی،دہشت گرد حملے کے فوری بعد اظہار یکجہتی کیلئے چینی سفارتخانے کادورہ کیا،یقین دلایا کہ دہشت گردوں کو کیفر کردار تک پہنچا کررہیں گے۔

وزیراعظم شہبازشریف نے کہا کہ واقعہ کے فوری بعد جوائنٹ انویسٹی گیشن ٹیم اور انکوائری کا حکم دیا،انکوائری کمیشن کی رپورٹ پر مکمل عملدرآمد کرائیں گے،کسی کو بھی پاک چین دوستی کو نقصان پہنچانے نہیں دیں گے،چینی بھائیوں کی سلامتی ہماری سلامتی ہے،ہمارا دشمن پاک چین دوستی کو نقصان پہنچانے میں کوئی موقع ہاتھ سے نہیں جانے دیتا،حکومت پاکستان چینی انجینئرز کو ہر ممکن سکیورٹی فراہم کرے گی،چین اورپاکستان کی دوستی ہمالیہ سے بلند اور سمندروں سے زیادہ گہری ہے۔