عمران خان کی رہائی کے لیے بشریٰ بی بی کی سفیروں سے ملاقاتیں، رہائی کے مطالبے کو بیرونی حمایت ملنے کے امکانات

اٹک جیل میں قید عمران خان کی رہائی اور الیکشن لڑنے کے موقع کی حمایت کے لیے بشریٰ بی بی کی چھ ملکوں کے سفیروں سے ملاقاتیں اور اسکے بعد عمران خان سے جیل میں ملاقاتیں اور پیغامات کا تبادلہ ملکی سیاست میں اہم ہو سکتا ہے۔

سفارتی ذرائع کے مطابق عمران خان کی رہائی اور الیکشن میں حصہ لینے کی اجازت کے مطالبے کو بیرون ملک سے مدد ملنے کے امکانات ہیں۔

ذرائع کا کہنا ہے کہ بشریٰ بی بی سفیروں سے ملاقاتوں کے متعلق اپنے اسیر شوہر سے پیغامات کا تبادلہ اور ہدایت حاصل کرنے کیلئے مسلسل رابطے کر رہی ہیں اور صرف اگست کے مہینے میں چار ملاقاتیں کر چکی ہیں۔ منگل کے روز بھی اٹک جیل میں ان کی ون ٹو ون ملاقات ایک گھنٹے سے زیادہ وقت پر محیط تھی۔

گزشتہ ماہ کے اوائل میں پاکستان تحریک انصاف کے چیئرمین کو ریلیف دلانے کیلئے پی ٹی آئی کی سینئر قیادت نے وفاقی دارالحکومت اسلام آباد میں بعض اہم مغربی ممالک کے سفیروں اور ہائی کمشنرز سے ملاقات کی تھی جس کا اہتمام پاکستان میں متعین آسٹریلیا کے ہائی کمشنر نے اپنی رہائش گاہ پر کیا تھا جس میں امریکہ، برطانیہ، کینیڈا، انڈونیشیا اور ناروے کے سفیر اور ہائی کمشنر شامل تھے۔