عمران خان کے خلاف مقدمات 8 جولائی سے روزانہ کی بنیاد پر چلائے جائیں گے، عدالت کا عندیہ

بانی پی ٹی آئی عمران خان اور دیگر کیخلاف تھانہ سنگجانی اور آئی 9 میں درج مقدمات کی سماعت انسداددہشتگردی عدالت اسلام آباد نے کی، عدالت نے 8 جولائی کے بعد کیسز کی سماعت روزانہ کی بنیاد پر کرنے کا عندیہ دے دیا۔۔۔عدالت نے بانی پی ٹی آئی کی ویڈیو لنک پیشی کے حوالے سے سپریڈنٹ اڈیالہ جیل سے تحریری جواب طلب کر لیا ہے۔

انسدادِ دہشت گردی عدالت کے جج طاہر عباس سپرا نے کیسز پر سماعت کی،علی نواز اعوان، واثق قیوم ،عامر کیانی و دیگر عدالت میں پیش ہوئے، وزیر اعلیٰ کے پی کے علی امین گنڈاپور ،عامر مغل کیجانب سے حاضری سے استثنیٰ کی درخواست دائر کی گئی۔

جج طاہر عباس سپرا نے ریمارکس دیے کہ کسی کی حاضری سے استثنیٰ کی درخواست قبول نہیں ہوگی،یہ کوئی وجہ نہیں کہ میں شہر سے باہر ہوں تو پیش نہیں ہوسکتا۔

جج طاہر عباس سپرا نے استفسار کیا کہ حاضری پوری نا ہونا ملزمان پر ہے یا کورٹ پر ہے؟ پی ٹی آئی وکلا نے بتایا کہ حاضری پوری کرنے ملزمان پر ہے۔

جج طاہر عباس سپرا نے ریمارکس دیے کہ تمام غیر حاضر ملزمان کے وارنٹ گرفتاری ہوں گے۔ وکلا صفائی نے یقین دہانی کرائی کہ اگلی پیشی پر تمام ملزمان کی حاضری یقینی ہو گی۔

جج طاہر عباس سپرا نے ریمارکس دیے کہ تمام غیر حاضر ملزمان کے بلا ضمانت وارنٹ گرفتاری جاری کررہے ہیں،آئندہ پیشی پر حاضری کے والے سے مکمل یقین دہانی کروائی جائے گی تو پھر وارنٹ کا معاملہ دیکھیں گے۔

وکلاء صفائی نے استدعا کی کہ ایک موقع دیا جائے اگلی پیشی پر تمام ملزمان پیش ہوں گے۔ جج طاہر عباس سپرا نے وارننگ دی کہ جو ملزم 8 تاریخ کو نہیں آئیں گے انکو اشتہاری قرار دوں گا،عدالتی مفرور کو اشتہاری قرار دینے کیلئے تیس دن ضروری نہیں ہیں۔

جج طاہر عباس سپرا نے ریمارکس دیے کہ میں نے ان کیسز کو انجام تک پہچانا ہے آپکا ہی اس میں فائدہ ہوگا،اگر کیسز میں جان ہوئی تو چلیں گے ورنہ فارغ ہوں گے۔

عدالت نے دونوں مقدمات کی سماعت 8 جولائی تک ملتوی کردی۔