ہائیکورٹس میں ججوں کی تعیناتی کے لیے چیف جسٹس قاضی فائز عیسیٰ نے 13 ستمبر کو جوڈیشل کمیشن کا اجلاس بلا لیا

چیف جسٹس پاکستان نے جوڈیشل کمیشن کا اجلاس 13 ستمبر کو طلب کر لیا ۔چیف جسٹس پاکستان نے پانچوں ہائیکورٹس کے چیف جسٹس صاحبان کو خط لکھ دیا۔

خط میں جسٹس قاضی فائز عیسیٰ نے کہا ہے کہ دو سال بعد سپریم کورٹ اپنی مکمل استعداد کے مطابق کام کرنا شروع کیا ہے،چار سال کے بعد سپریم کورٹ شریعت اپیلٹ جج تعینات کر کے بینچ کو فعال کیا،میں چاہتا ہوں کہ آپ اپنی ہائیکورٹ میں ججز کی تعیناتی پر بھی غور کریں۔

قاضی فائز عیسیٰ نے یاد دلایا کہ 2010 میں جوڈیشل کمیشن کے رولز بنائے گئے تھے،بار کونسلوں اور بار ایسوسی ایشنوں کا کافی عرصے سے مطالبہ رہا ہے کہ ججز کی تعیناتی کے طریقہ کار میں شفافیت ہونی چاہیے،میں نے جوڈیشل کمیشن رولز میں اصلاحات کے لیے ایک کمیٹی تشکیل دی تھی۔

چیف جسٹس نے لکھا کہ جوڈیشل کمیشن رولز کمیٹی نے تین مئی 2024 کو اپنی رپورٹ سفارشات پر مبنی پیش کی،تین مئی کو میں جوڈیشل کمیشن اجلاس پر کاروائی چلانا چاہتا تھا لیکن اکثریت کے کہنے پر اجلاس ملتوی کیا۔

خط میں کہا گیا کہ جوڈیشل کمیشن اصلاحات کمیٹی کا اجلاس دوبارہ طلب کیا گیا ہے،میری درخواست ہے کہ آپ اپنی متعلقہ ہائیکورٹس میں ایڈیشنل ججز کی تعیناتی کے لیے اچھے نام پیش کریں۔

چیف جسٹس نے لکھا کہ یہ مناسب ہوگا کہ آئندہ اجلاس میں ہر ہائیکورٹ میں پانچ پانچ ججز کی تعیناتی کا عمل مکمل ہو،اس عمل کا مقصد ہے کہ بہترین ججز کو تعینات کیا جا سکے۔