وزیراعلیٰ علی امین گنڈاپور نے حلف اٹھا لیا، گورنر ہاؤس میں پی ٹی آئی کارکنوں کی دھکم پیل، شدید بدنظمی

صوبہ خیبرپختونخوا کے نومنتخب وزیراعلیٰ علی امین گنڈاپور نے اپنے عہدے کا حلف اٹھا لیا،۔گورنر کے پی غلام علی نے ان سے حلف لیا۔

حلف برداری کی تقریب گورنر ہاؤس پشاورمیں ہوئی۔ تقریب شدید بدنظمی کا شکار رہی،گورنر ہاؤس پی ٹی آئی کارکنوں سے بھر گیا ،،شدید دھکم پیل  سے تقریب میں بدمزگی ہوئی۔

پنڈا ل میں  نشستیں خالی کرنے کے لیے اعلانات کئے جاتے رہے اور کہا گیا کہ کارکنان سن لیں آپ پر وزیر اعلیٰ ہاؤس، سپیکر ہاؤس کے دروازے بند کردئیے جائینگے۔

دھکم پیل کے علاوہ بارش کے باعث بھی پریشانی ہوئی اور پنڈال بارش اور تیز ہوا سے اکھڑنا شروع ہو گیا تھا۔

حلف برداری میں چیف سیکرٹری، چیف جسٹس ہائیکورٹ، آئی جی پولیس سمیت دیگر نے شرکت کی۔

گزشتہ روز ووٹنگ کے دوران قائدِ ایوان منتخب ہونے کے لیے علی امین کے حق میں 90 جبکہ مخالف امیدوار پاکستان مسلم لیگ ن کے عباد اللہ خان کو ارکان نے 16 ووٹ دیے تھے۔

آزاد حیثیت میں ڈیرہ اسماعیل خان سے الیکشن میں کامیاب علی امین گنڈا پور کو سنی اتحاد کونسل کی حمایت حاصل تھی جبکہ عباد اللہ خان کو پیپلز پارٹی اور پی ٹی آئی پارلیمنٹیرینز کی حمایت حاصل تھی۔

صوبائی اسمبلی میں اپنے پہلے خطاب میں علی امین گنڈا پور کا کہنا تھا کہ انہیں آزاد حیثیت سے منتخب ہونے کا دکھ ہے۔

انہوں نے 9 مئی کے پُرتشدد احتجاجی مظاہروں میں اپنے ملوث نہ ہونے کی دلیلیں دیتے ہوئے پولیس حکام کو الٹی میٹم بھی دیا تھا کہ جو لوگ ملوث نہیں ان کیخلاف ایف آئی آر اگلے ایک ہفتے میں ختم کی جائیں۔