آئین کہتا ہے قانون سازی قرآن و سنت کے تابع ہوگی، مولانا فضل الرحمان

جمیعت علمائے اسلام (ف) کے سربراہ مولانا فضل الرحمان کا کہنا ہے کہ آئین کہتا ہے قانون سازی قرآن وسنت کے تابع ہوگی۔

سندھ کے ضلع کندھ کوٹ میں انتخابی جلسے سے خطاب کرتے ہوئے مولانا فضل الرحمان کا کہنا تھا کہ کیا ہم نے کلمے کا حق ادا کیا؟

انہوں نے کہا کہ پانچ سال میں معیشت تباہ کی گئی، ان کو دھاندلی اور ووٹ چوری کرکے لایا گیا۔

مولانا فضل الرحمان نے کہا کہ سندھ میں آئے روز لوگ اغوا ہورہے ہیں۔

انہوں نے کہا کہ امریکا افغانستان میں شکست کھا کر بھاگ گیا، فلسطینیوں کی نسل کشی کو یورپ سپورٹ کررہا ہے، امریکی دفاعی قوت چین اور روس کی وجہ سے کمزور ہوچکی ہے۔

مولانا فضل الرحمان نے کہا کہ فلسطین کے معاملے پریہاں کی قیادت بھی خاموش ہے۔

ان کا کہنا تھا کہ کسی طاقتور کا ہاتھ غریب کے گریبان پر آئے گا تو وہ توڑ دیں گے۔

انہوں نے کہا کہ ہم گھر گھر ترقی کا پیغام پہنچائیں گے، ہم مقابلے کے لیے میدان میں ہیں، ہم ملک کی معیشت بہترکرنا چاہتے ہیں، ہمیں اس ملک کی خوشحالی چاہیے۔