عدالتوں کو سیاسی مقدمات سے فرصت نہیں، فوجداری نظام انصاف میں بہت خامیاں ہیں، وفاقی وزیر قانون

وزیر قانون اعظم نذیر تارڑ کا کہنا ہے کہ حکومت سمجھتی ہے فوجداری نظام انصاف میں بہت خامیاں ہیں، عدالتوں کو سیاسی مقدمات سے فرصت نہیں، آج بھی ہم فل کورٹ کا مطالبہ کرتے ہیں۔

اسلام آباد میں تقریب سے خطاب کرتے ہوئے وزیر قانون  نے کہا کہ اگر ہم چاہتے ہیں ہماری عدالتیں 134ویں نمبر سے باعزت نمبر پر آئیں تو مثبت تبدیلیاں لانا ہوں گی، مسائل کے حل کےلیےصرف قانون سازی نہیں عمل درآمد بھی ضروری ہے، مسائل کے حل کےلیے بات چیت کا راستہ اختیار کرنا چاہیے۔

وزیر قانون نے کہا کہ قانون پر عمل درآمد ایک سنجیدہ معاملہ ہے، قوانین پر عمل درآمد ریاست کی ذمے داری ہے، ہمیں بہت سوچ بچار کے بعد قانون بنانے چاہئیں، معاشرے کی بہتری کیلئے منفی رویوں کو بدلنے کی ضرورت ہے، وقت آگیا ہے مسائل کے حل کیلئے ہنگامی بنیادوں پر اقدامات کیے جائیں گے۔

اعظم نذیر تارڑ نے یہ بھی کہا کہ ہر شعبے میں خواتین کو برابر کے مواقع ملنے چاہئیں، ہمیشہ کہتا ہوں کہ سیمینارز تقاریب سے نکل کر اصل تعمیری کام پر آئیں، خوشی ہے کہ ایک وسیع معاملے پر غور و خوض کیا گیا۔

وزیر قانون نے کہا کہ خواتین کا وراثتی حق ہمارا پرانا مسئلہ ہے، قانون بنا دینا قدرے آسان کام ہے لیکن عملدرآمد مشکل کام ہے، ہمارے قانون پر عملدرآمد ایک سنجیدہ معاملہ ہے، سپریم کورٹ نے خواتین کو وراثت میں حق دینے سے متعلق اہم فیصلے کیے، معاشرے میں آج بھی خواتین پر تشدد ہو رہا ہے، اپر اور لوئر کلاس میں بھی خواتین پر تشدد کی شکایات موجود ہیں۔

اعظم نذیر تارڑ نے مزید کہا کہ آج کشکول اٹھانے کی بڑی وجہ یہ ہے کہ خواتین کو مردوں نے اپنے شانہ بشانہ کھڑا نہیں کیا، جب تک مرد اور عورت مل کر کام نہیں کریں گے ترقی نہیں ہوگی، خواتین پر تشدد کی بڑی وجہ بھی یہی ہے کہ خواتین گھروں میں ہیں، خواتین پر تشدد سے متعلق کئی ترامیم تیاری کے مراحل میں ہیں۔