حوالہ ہنڈی کے کاروبار پر کریک ڈاؤن جاری،کراچی میں غیرقانونی منی چینجر پکڑا گیا

ایف آئی اے کمرشل بینکنگ سرکل کراچی نے کارروائی کے دوران بغیر لائسنس منی چینجر اور حوالہ ہنڈی کا کاروبار کرنے والے ملزم کو گرفتار کرلیا۔

ترجمان ایف آئی اے کے مطابق ڈائریکٹر کراچی زون عبدالسلام شیخ کی ہدایت پر حوالہ ہنڈی اور کرنسی کی غیر قانونی ایکسچینج میں ملوث عناصر کے خلاف کریک ڈاون جاری ہے۔

ڈپٹی ڈائریکٹر کمرشل بینکنگ سرکل کراچی رابعہ قریشی کی زیر نگرانی چھاپہ مار کاروائی میں حوالہ ہنڈی اور کرنسی کی غیر قانونی ایکسچینج میں ملوث ملزم کو گرفتارکیا گیا۔

ملزم سمیر بغیر لائسنس کے منی چینجر اور حوالہ ہنڈی کا کاروبار کر رہا تھا،ملزم کو چھاپہ مار کارروائی میں دہلی کالونی کراچی سے گرفتار کیا گیا۔

چھاپے کے دوران ملزم سے 70 ہزار امریکی ڈالر برآمد کر لئے گئے،ملزم کے موبائل سے ہنڈی حوالہ سے متعلق متعدد رسیدیں اور پیغامات بھی برآمد کر لئے گئے۔

ملزم کے خلاف مقدمہ درج کر کے تفتیش کا آغاز کر دیا گیا ہے۔