ناچنے والے گھوڑے میدان میں دوڑتے نہیں، میرا پڑوسی کوئی بیان دیتا ہے تو انجوائے کرتا ہوں، فیصل کریم کنڈی

خیبر پختون خوا کے گورنر فیصل کریم کنڈی نے کہا ہے کہ سیاست ٹھنڈے دماغ کا کام ہے، جذبات سے کام نہیں لینا چاہیے۔

پشاور میں میڈیا سے گفتگو کرتے ہوئے انہوں نے کہا کہ ناچنے والے گھوڑے میدان میں نہیں دوڑتے، میرا پڑوسی کوئی بیان دیتا ہے تو بہت انجوائے کرتا ہوں۔

فیصل کریم کنڈی نے کہا کہ تعلیم سے متعلق ہمیں باقی صوبوں کا مقابلہ کرنا چاہیے، وزیرِ اعلیٰ کو وائس چانسلرز کی تعیناتیوں سے متعلق خط لکھا ہے، صوبے کو آئین و قانون کے مطابق چلاؤں گا۔

گورنر کے پی نے کہا کہ وزیرِ اعظم کو خط لکھا کہ ہائیر ایجوکیشن کے لیے رقم دی جائے، سیاسی بھرتیوں کو چھوڑ کر وائس چانسلرز کی بھرتیاں ہونی چاہئیں۔

انہوں نے کہا کہ لڑائی چھوڑ کر صوبے کے لیے کام کرنا ہوگا، بلاول جب بھی کے پی ہاؤس آئیں گے ڈنکے کی چوٹ پر آئیں گے۔

گورنر فیصل کریم کنڈی نے مزید کہا کہ دعا ہے کہ آج پاکستان کی ٹیم بھارت سے میچ جیت جائے، دعا تو ہم کریں گے لیکن ٹیم بھی کچھ کرے۔

ان کا یہ بھی کہنا ہے کہ ایسے نہیں ہوتا کہ ہم دعائیں کریں اور وہاں وہ کیچ ڈراپ کریں۔