کئی دہائیوں کی پالیسیاں ایک دن میں تبدیل نہیں کر سکتے، نگران وزیر خزانہ

نگران وزیر خزانہ ڈاکٹر شمشاد اختر نے کہا ہے کہ ہماری حکومت مخلصانہ طور پر عوام کی بہتری کیلئے کام کرے گی، کئی دہائیوں کی پالیسیوں کو ایک دن میں تبدیل نہیں کرسکتے۔

میڈیا سے گفتگو میں ڈاکٹر شمشاد اختر نے کہا کہ آئی ایم ایف سے بات ہوئی ہے ان کو یقین دہانی کرائی ہے معاہدے پر عمل کریں گے، کئی دہائیوں کی پالیسیوں کو ایک دن میں تبدیل نہیں کرسکتے۔

ڈاکٹر شمشاد اختر نے کہا کہ سابق حکومت نے جو معاہدہ کیا ہے اس کے مطابق چلیں گے، میرے لئے آئی ایم ایف نہیں بلکہ پاکستان کی معیشت اولیت رکھتی ہے۔

ڈاکٹر شمشاد اختر نے کہا کہ سماجی تحفظ کے منصوبوں کے ذریعے غریبوں کو ریلیف فراہم کررہے ہیں،پاکستان کیلئے معاشی استحکام کا حصول اور مالی خسارہ ختم کرنا ضروری ہے، بجلی کے شعبے میں مراعات نئی نہیں اورکئی عرصہ پہلے سے دی گئی ہیں۔