مشترکہ مفادات کے تحفظ کے لئے موثر اقدامات کریں گے، وزیراعظم شہباز شریف کے دورہ کے بعد مشترکہ اعلامیہ جاری کردیا گیا

وزیراعظم محمد شہباز شریف چین کا پانچ روزہ سرکاری دورہ مکمل کرنے کے بعد ہفتہ کو پاکستان پہنچ گئے۔ اس حوالے سے پاکستان اور چین نے مشترکہ اعلامیہ جاری کردیا ہے۔

واضح رہے کہ چین کے وزیر اعظم لی کیانگ کی دعوت پر شہباز شریف نے یہ دورہ کیا۔ اپنے دورے کے دوران وزیراعظم نے اپنے اعلیٰ سطحی وفد کے ہمراہ چینی قیادت اور حکام سے ملاقاتیں کیں۔ دورے کے دوران چین کے کاروباری اداروں اور سرمایہ کار کمپنیوں کو پاکستان میں سرمایہ کاری کی دعوت دی گئی۔

پاکستان اور چین نے اس عزم کا اعادہ کیا ہے کہ دونوں ممالک کے درمیان تعلقات کو اسٹریٹجک اونچائی اور طویل مدتی نقطہ نظر سے دیکھنا جاری رکھیں گے، پاکستان اور چین کے مشترکہ مفادات کے تحفظ کے لئے موثر اقدامات کریں گے اور دونوں ممالک کے عوام کی سماجی و اقتصادی ترقی اور فلاح و بہبود کو فروغ دیں گے۔

پاکستان اور چین نے وزیر اعظم محمد شہباز شریف کے پانچ روزہ دورہ چین کے اختتام پر جاری ہونے والے ایک مشترکہ بیان میں کہا ہے کہ دونوں فریقین نے علاقائی امن، استحکام، ترقی اور خوشحالی کو مشترکہ طور پر برقرار رکھنے کے لئے مل کر کام کرنے اور نئے دور میں مشترکہ مستقبل کے ساتھ پاکستان اور چین کی کمیونٹی کی تعمیر کو تیز کرنے پر اتفاق کیا۔

دفتر خارجہ کی جانب سے وزیر اعظم شہباز شریف کے دورہ چین کے حوالے سے مشترکہ اعلامیہ جاری کیا گیا۔

پاک چین مشترکہ اعلامیہ میں دونوں ممالک کے درمیان سکیورٹی تعاون پر زور دیا گیا۔

مشترکہ اعلامیہ کے مطابق پاک چین دفاعی تعاون خطے میں اسٹریٹجک توازن کے لیے اہم ہے۔

چین کا کہنا ہے کہ مسئلہ کشمیر کا حل اقوام متحدہ کی قرار دادوں کے مطابق ضروری ہے۔