امریکا، قطر اور مصر کی ثالثی میں غزہ میں 30 دن کے سیز فائر کی کوششیں تیز

اسرائیل اور حماس نے اصولی طور پر اس بات پر اتفاق کیا ہے کہ فلسطینی قیدیوں اور اسرائیلی یرغمالیوں کا تبادلہ ایک ماہ کی جنگ بندی کے دوران ہو سکتا ہے، لیکن غزہ جنگ کو مستقل طور پر ختم کرنے کے طریقہ کار پر اختلافات  فریم ورک پلان میں رکاوٹ ہے۔

حالیہ ہفتوں میں قطر، واشنگٹن اور مصر کی قیادت میں ثالثی کی بھرپور کوششوں نے مختلف کیٹیگریز کے اسرائیلی یرغمالیوں کی رہائی کے لیے مرحلہ وار نقطہ نظر پر توجہ مرکوز کی ہے – جس کا آغاز عام شہریوں سے ہو اور فوجیوں پر ختم ہو، عارضی جنگ بندی کے دوران فلسطینی قیدیوں کی رہائی اور غزہ کے لیے امداد بھی اس میں شامل ہے۔

روئٹرز کے مطابق شٹل ڈپلومیسی کا تازہ ترین دور 28 دسمبر کو شروع ہوا اور ان مذاکرات میں جنگ بندی کی طوالت کے بارے میں ابتدائی  اختلاف کم کر کے تقریباً 30 دن کر دیا گیا ہے۔

تاہم، چھ ذرائع کے مطابق، حماس نے اس وقت تک منصوبوں پر آگے بڑھنے سے انکار کر دیا ہے جب تک کہ مستقل جنگ بندی کی مستقبل کی شرائط پر اتفاق نہیں ہو جاتا۔

ثالثی کی کوششوں کے قریب ایک فلسطینی اہلکار نے بتایا کہ حماس ایک "پیکیج ڈیل” کی کوشش کر رہی ہے جو ابتدائی مرحلے کے دوران یرغمالیوں کی رہائی سے قبل مستقل جنگ بندی پر اتفاق کرے۔ اسرائیل اور حماس براہ راست بات نہیں کر رہے، ثالث کے ذریعے بات کر رہے ہیں۔

وائٹ ہاؤس کے ترجمان نے منگل کے روز کہا کہ مشرق وسطیٰ کے لیے امریکی ایلچی بریٹ میک گرک ایک ہفتے میں دوسری بار خطے میں ہیں تاکہ یرغمالیوں کی رہائی کے بارے میں بات چیت کی جا سکے اور یہ کہ واشنگٹن طویل عرصے تک انسانی بنیادوں پر وقفے کی حمایت کرے گا۔

امریکی محکمہ خارجہ اور وائٹ ہاؤس، قطر کی وزارت خارجہ اور مصر کی اسٹیٹ انفارمیشن سروس نے فوری طور پر تبصرہ کی درخواستوں کا جواب نہیں دیا۔

مصر کے دو سیکورٹی ذرائع نے بتایا کہ حماس کو ایک ماہ کی جنگ بندی کو قبول کرنے کے لیے قائل کرنے کے لیے کام جاری ہے جس کے بعد مستقل جنگ بندی کی جائے گی۔ تاہم، حماس ابتدائی جنگ بندی پر راضی ہونے کے لیے اس بات کی ضمانت کی درخواست کر رہی ہے کہ معاہدے کا دوسرا مرحلہ انجام دیا جائے گا۔

ذرائع نے اس بات کی تفصیلات فراہم نہیں کیں کہ اس قسم کی ضمانتیں کیا ہوسکتی ہیں۔

مذاکرات کے بارے میں پوچھے جانے پر، حماس کے سینیئر اہلکار سمیع ابو زہری نے پیر کو روئٹرز کو بتایا کہ تنظیم آئیڈیاز پر بات چیت کے لیے تیار ہے لیکن ابھی تک کوئی معاہدہ نہیں ہوا۔

ابو زہری نے کہا، "ہم تمام اقدامات اور تجاویز کے لیے کھلے ہیں، لیکن کسی بھی معاہدے کی بنیاد جارحیت کے خاتمے اور غزہ کی پٹی سے قبضے کے مکمل انخلاء پر ہونی چاہیے۔”

حماس کے ایک سینئر عہدیدار نے بتایا کہ اسرائیل کی طرف سے ایک پیشکش یہ ہے کہ اگر حماس غزہ سے چھ سینئر رہنماؤں کو نکال دے تو جنگ ختم کر دی جائے۔ تاہم، حماس نے اس تجویز کو "بالکل” مسترد کر دیا۔

ذرائع نے بتایا کہ اس فہرست میں حماس کے اسرائیل پر 7 اکتوبر کے حملوں کے ماسٹر مائنڈ یحییٰ سنوار اور محمد الضیف شامل ہیں، جو جنگ میں مارنے یا پکڑنے کے لیے اسرائیل کے سب سے بڑے اہداف ہیں۔

رائٹرز فوری طور پر اسرائیلی ذرائع سے اس تجویز کی تصدیق نہیں کر سکا۔ اسرائیلی وزیر اعظم بنجمن نیتن یاہو کے دفتر نے اس تجویز یا وسیع تر مذاکرات کے بارے میں تبصرہ کرنے کی درخواست کو مسترد کر دیا۔ اسرائیل کے این 12 نیوز نیٹ ورک کو لیک ہونے والی ریکارڈنگ کے مطابق، نیتن یاہو نے کہا کہ جنوری کے اوائل میں اس طرح کے "ہتھیار ڈالنے اور جلاوطنی” کے منظر نامے پر تبادلہ خیال کیا جا رہا تھا۔

نیتن یاہو پر دباؤ

جنوبی اسرائیل پر حماس کے حملے کے تقریباً چار ماہ بعد جس میں تقریباً 1,200 افراد مارے گئے تھے، غزہ میں اسرائیل کی جارحیت نے ابھی تک حماس کی اعلیٰ قیادت یا اس کی لڑنے کی صلاحیت کو ختم نہیں کیا ہے، اس کے باوجود کہ ساحلی علاقوں کا بڑا حصہ مسمار کر دیا گیا اور 25,000 سے زیادہ فلسطینی مارے گئے۔

نیتن یاہو نے اس ہفتے اس بات کا اعادہ کیا کہ حماس پر صرف "مکمل فتح” ہی جنگ کا خاتمہ کرے گی، لیکن ان پر کسی معاہدے تک پہنچنے کے لیے دباؤ بڑھ رہا ہے۔

اسرائیل کی فوج نے پیر کے روز غزہ پر اپنے حملے میں سب سے زیادہ ہلاکتوں کا سامنا کیا جس میں 24 ہلاکتیں ہوئیں۔

ذرائع نے بتایا کہ اسرائیل نے جنگ کے خاتمے پر بات کرنے سے انکار کر دیا ہے۔

اسرائیلی حکومت کے ترجمان ایلون لیوی نے منگل کو ایک پریس کانفرنس میں کہا کہ مغویوں کی رہائی کے لیے کوششیں جاری ہیں۔ انہوں نے کہا کہ اسرائیل ایسے جنگ بندی کے معاہدے سے اتفاق نہیں کرے گا جس میں غزہ کااقتدار حماس کے پاس ہو۔

قطر اور واشنگٹن نے نومبر میں ایک ہفتہ طویل جنگ بندی پر بات چیت میں اہم کردار ادا کیا تھا جس کے نتیجے میں 100 سے زائد مغویوں اور 240 کے قریب فلسطینی قیدیوں کو رہا کیا گیا تھا۔

28 دسمبر سے شروع ہونے والے، قطر کے مذاکرات کاروں نے ایک نئے معاہدے کا فریم ورک حماس اور اسرائیل کو بھیجا، جس میں دونوں فریقوں سے کہا گیا کہ وہ اس بات کی نشاندہی کریں کہ وہ کس چیز پر راضی ہونے کے لیے تیار ہیں۔

اہلکار نے بتایا کہ جب دونوں فریقوں نے اس ماہ کے شروع میں جواب دیا تو حماس نے کئی ماہ کی جنگ بندی کی تجویز دی۔جبکہ اسرائیل چاہتا ہے کہ تمام یرغمالیوں کو ہفتوں میں رہا کر دیا جائے۔

عہدیدار نے بتایا کہ گزشتہ چند ہفتوں کے دوران، امریکی اور قطری ثالث دونوں فریقین کو 30 روزہ عمل پر اتفاق کرنے کے قریب لے آئے ہیں، جس میں تمام یرغمالیوں کی رہائی، غزہ میں مزید امداد کی فراہمی اور فلسطینی قیدیوں کی رہائی شامل ہے۔

ذرائع نے، بات چیت پر بریفنگ دیتے ہوئے، بات چیت کو گہرا قرار دیا اور کہا کہ "کسی بھی لمحے” معاہدے پر اتفاق کیا جا سکتا ہے۔

امریکی سفارتی کوششیں

واشنگٹن تشدد کے خاتمے کے لیے سفارتی دباؤ بڑھا رہا ہے۔ جنوری کے شروع میں، امریکی وزیر خارجہ انٹنی بلنکن نے عرب ریاستوں اور اسرائیل کا  دورہ کیا جس کا مقصد خونریزی سے نکلنے کا راستہ تلاش کرنا تھا۔

ایک امریکی ذریعے نے اس معاملے پر بریفنگ دی اور فلسطینی اہلکار نے بتایا کہ حماس اس بات کی ضمانت مانگ رہی ہے کہ اسرائیل تنازعہ دوبارہ شروع نہیں کرے گا،

فلسطینی عہدیدار نے کہا کہ حماس چاہتی ہے کہ امریکہ، مصر اور قطر اس پر عمل درآمد کی ضمانت دیں، اور اسے خدشہ ہے کہ نیتن یاہو کی حکومت حماس کی طرف سے شہری یرغمالیوں کو رہا کرنے کے بعد لڑائی دوبارہ شروع کر دے گی۔

امریکی ذریعے نے بتایا کہ اس دور کے دوران، حماس نے اسرائیل کی جیلوں سے تمام فلسطینی قیدیوں کی رہائی کا مطالبہ کیا، جن میں 7 اکتوبر کے حملوں میں حصہ لینے والے بھی شامل تھے۔ عہدیدار نے بات چیت کے بارے میں بریفنگ دیتے ہوئے کہا کہ حماس نے اس کے بعد سے اس مطالبے کو نرم کر دیا ہے۔

فلسطینی عہدیدار نے کہا کہ حماس کا خیال ہے کہ طویل مدتی جنگ بندی کے بارے میں سنجیدگی سے بات کرنے سے پہلے، اسرائیل غزہ کے جنوبی شہر خان یونس میں اپنی کارروائیوں کو ختم کرنا چاہتا ہے۔

ابھی یہ واضح نہیں کہ کسی طویل جنگ بندی کے دوران اسرائیل کے فوجی اور ہتھیار غزہ میں موجود رہیں گےیا نہیں۔