سینیٹ کی قائمہ کمیٹیوں کے سربراہوں کا انتخاب، سینیٹر پلوشہ خان قائمہ کمیٹی انفارمیشن ٹیکنالوجی کی چیئرپرسن منتخب

سینیٹ کی قائمہ کمیٹیوں کے چیئرمینوں کے انتخابات کا سلسلہ آج بھی جاری رہا اور ایوان بالا کی متعدد کمیٹیوں کے چیئرمین منتخب کر لئے گئے۔

قائمہ کمیٹی انفارمیشن ٹیکنالوجی

سینیٹر پلوشہ محمد زئی خان کو سینیٹ کی قائمہ کمیٹی برائے انفارمیشن ٹیکنالوجی و ٹیلی کمیونیکیشن کی چیئرپرسن منتخب کیا گیا۔ کمیٹی کے چیئرمین کے لئے ان کا نام سینیٹر ندیم احمد بھٹو نے تجویز کیا جبکہ سید کاظم علی شاہ نے اس کی تائید کی۔ سینیٹر پلوشہ محمد زئی خان نے تمام اراکین کمیٹی کا شکریہ ادا کیا۔ انہوں نے کہا کہ آئی ٹی کا شعبہ معاشی ترقی میں اہم کردار ادا کر رہا ہے اور زندگی کے ہر شعبے میں آئی ٹی کی اہمیت بڑھ گئی ہے۔ انہوں نے کہا کہ آئی ٹی کے شعبے کی بہتری کے لئے مل کر کام کریں گے اور ایسی سفارشات مرتب کی جائیں گی جس سے مزید بہتری لائی جا سکے۔

قائمہ کمیٹی ہاؤسنگ اینڈ ورکس

سینیٹر ناصر محمود کو سینیٹ کی قائمہ کمیٹی ہاؤسنگ اینڈ ورکس کے چیئرمین کے طور پر منتخب کر لیا گیا۔ ان کا نام بطور چیئرمین قائمہ کمیٹی سینیٹر اسلم ابڑو نے تجویز کیا جبکہ حسنہ بانو نے تائید کی۔ سینیٹر ناصر محمود نے کہا کہ تمام اراکین کمیٹی کا شکریہ ادا کرتا ہوں جنہوں نے ان پر اعتماد کا اظہار کیا۔ انہوں نے کہا کہ ہاؤسنگ کے مسائل اور معاملات انتہائی اہم ہیں کمیٹی کی یہ کوشش ہو گی کہ ایسے اقدامات اٹھائے جس سے بہتری لائی جا سکے۔

قائمہ کمیٹی کامرس

سینیٹر انوشہ رحما ن احمد خان سینیٹ کی قائمہ کمیٹی برائے کامرس کی چیئرپرسن منتخب ہو گئیں۔ قائمہ کمیٹی کی چیئرپرسن کے لئے ان کا نام سینیٹر سلیم مانڈوی والا نے تجویز کیا جبکہ سینیٹر سرمد علی نے ان کی تائید کی۔ سینیٹر انوشہ رحمان نے اراکین کا شکریہ ادا کرتے ہوئے کہا کہ کامرس ایک اہم شعبے کی حیثیت اختیار کر چکا ہے اور ٹیکنالوجی کے اس دور میں ای کامرس کا رجحان بڑھتا جا رہا ہے۔ انہوں نے کہا کہ اراکین کمیٹی کے ساتھ مل کر ایسی سفارشات مرتب کی جائیں گی جس سے تجارت کو فروغ ملے گا۔

قائمہ کمیٹی ریلویز

سینیٹر جام سیف اللہ خان قائمہ کمیٹی برائے ریلوے کے چیئرمین منتخب ہوئے۔ سینیٹر ناصر محمود نے ان کا نام تجویز کیا اور سینیٹر اشرف علی جتوئی نے تائید کی۔ جام سیف اللہ خان نے کہا کہ سینئر سینیٹر ز کمیٹی کا حصہ ہیں۔ ان کے تجربے سے استفادہ کرتے ہوئے ریلوے جیسے اہم ادارے کی کارکردگی میں بہتری لانے کے لئے مشترکہ کوششیں کی جائیں گی۔

قائمہ کمیٹی پٹرولیم

سینیٹر عمر فاروق پیٹرولیم کی قائمہ کمیٹی کے چیئرمین کی حیثیت سے منتخب ہوئے۔ سینیٹر میر دوستین ڈومکی نے ان کانام تجویز کیا جبکہ سینیٹر قرہ العین مری نے ان کے نام کی تائید کی۔ بھرپور اعتماد پر چیئرمین کمیٹی نے تمام اراکین کا شکریہ ادا کیا۔

قائمہ کمیٹی نیشنل ہیلتھ سروسز

قائمہ کمیٹی برائے نیشنل ہیلتھ سروسز، ریگولیشن اور کوارڈینیشن کے لئے سینیٹر پلوشہ محمد زئی خان نے سینیٹرعامر ولی الدین چشتی کا نام تجویز کیا جبکہ سینیٹر سید مسرور احسن نے اسکی تائید کی۔ قائمہ کمیٹی نیشنل ہیلتھ سروسز کے چیئرمین نے کہا کہ صحت کے شعبے کے مسائل کے حل کو ترجیحات میں شامل کیا جائے گا۔قائمہ کمیٹی اس اہم شعبے سے متعلق امور کا بغور جائزہ لے گی۔

قائمہ کمیٹی انڈر ڈویلپڈ ایریاز

سینیٹر آغا شاہ زیب درانی ایوان بالا کی کم ترقی یافتہ علاقہ جات کے مسائل کی کمیٹی کے چیئرمین منتخب ہوئے۔ سینیٹر دنیش کمار نے سینیٹر آغا شاہ زیب درانی کا نام تجویز کیا اور سینیٹر سید کاظم علی شاہ نے ان کے نام کی تائید کی۔ نومنتخب چیئرمین کمیٹی نے کہا کہ کم ترقی یافتہ علاقہ جات کی کمیٹی کو دائرہ کار پسماندہ اور کم ترقی والے علاقوں تک ہے۔ اس ضمن میں بہت زیادہ کوششوں کی ضرورت ہے اور کمیٹی اراکین کی مشاورت کے ساتھ آگے بڑھے گی۔

قائمہ کمیٹی ایوی ایشن

سینیٹر عبدالقدوس سینیٹ کی قائمہ کمیٹی برائے ایوی ایشن کے چیئرمین منتخب ہوئے۔ سینیٹر شیری رحمان نے ان کا نام تجویز کیا تھا جبکہ سینیٹر سلیم مانڈوی والا نے اس کی تائید کی۔ اراکین کمیٹی نے ایوی ایشن کے سیکٹر کے مسائل کو اجا گر کیا اور کہا کہ ان مسائل کے حل کے لئے سنجیدہ کوششیں کرنا ہوں گی۔

قائمہ کمیٹی تخفیف غربت

سینیٹ کی قائمہ کمیٹی برائے تخفیف غربت و سماجی تحفظ کے چیئرمین کے انتخاب کیلئے سینیٹر سردار الحاج محمد عمر گوریج کا نام سینیٹر دوست علی جیسر نے تجویز کیا اور سینیٹر زجان محمد نے اس کی تائید کی۔