بجلی ہر مہینے مہنگی کی جائے گی، پلان آئی ایم ایف کے ساتھ شیئر کردیا گیا

حکومت نے اس سال بجلی کی قیمت بڑھانے کا منصوبہ تیار کر لیا ہے اور بجلی کی قیمت بار بار بڑھائی جاتی رہے گی، قیمت بڑھانے کا مقصد بجلی کے شعبے میں گردشی خسارے کو کم کرنا ہے جس کی شرط انٹرنیشنل مانیٹری فنڈ ( آئی ایم ایف) نے سٹینڈ بائی ارینجمنٹ کی منظوری کے وقت رکھی تھی۔

بجلی مہنگی کرنے کا جو پلان تیار کیا گیا ہے اس کے مطابق ستمبر تک سہ ماہی ایڈجسٹمنٹ کی مد میں بجلی 1 روپے 25 پیسے فی یونٹ مہنگی ہوگی جس کی مد میں 39 ارب روپے موصول ہوں گے۔

ستمبر سے دسمبر تک فیول ایڈجسٹمنٹ کی مد میں 4 روپے 37 پیسے فی یونٹ بجلی مہنگی ہوگی جس سے 122 ارب روپے موصول ہوں گے جبکہ سالانہ ریبیسنگ کی مد میں 5 روپے 75 پیسے بجلی مہنگی کرنے سے 560 ارب موصول ہوں گے۔

ذرائع کے مطابق رواں مالی سال کے اختتام تک پاور سیکٹر کا گردشی قرضہ 2130 ارب تک محدود کیا جائے گا جو جون 2023 تک 27 سو ارب روپے کے لگ بھگ ہو چکا تھا۔

اس حوالے سے ذرائع کا کہنا ہے کہ وزارتِ خزانہ اور وزارتِ توانائی نے بجلی مہنگی کرنے کا پلان آئی ایم ایف کو بھی شیئر کر دیا گیا ہے۔