بس بہت ہو گیا، جو ریاست کے خلاف کھڑا ہوگا اس سے مذاکرات نہیں ہوں گے، اسحاق ڈار

ڈپٹی وزیراعظم اور وزیر خارجہ اسحاق ڈار نے جسٹس اطہرمن اللہ کے بیان پر تبصرہ سے گریز کرتے ہوئے کہا ہے کہ جسٹس اطہر من اللہ نے وزیراعظم کو جو جواب دیا اس پر وزیراعظم سے پوچھیں۔

پارلیمنٹ ہاؤس میں میڈیا سے غیررسمی گفتگو میں اسحاق ڈار نے کہا کہ پاکستان کو ٹیک آف کرنے کے دوران کتنی بار گرانا ہے،ہم پاکستان کو کئی بار ٹیک آف کرتے گرا چکے ، enough is enough ۔جو ریاست کے خلاف کھڑا ہوگا اس سے مذاکرات نہیں ہوں گے۔

اسحاق ڈار نے کہا کہ مذاکرات اور مفاہمت پر میرا پختہ یقین ہے، اسی پارلیمنٹ کے سامنے 126 دن کے دھرنے کو مذاکرات سے اٹھایا تھا،سیاست میں مفاہمت اور مذاکرات ہوتے ہیں اور ہونے چاہئیں۔

اسحاق ڈار نے کہا کہ سانحہ نو مئی ریاست کے خلاف اٹھنا تھا،جی ایچ کیو ، جناح ہائوس اور تنصیبات پر حملہ کرنے پر کوئی معافی نہیں دے سکتا،فارمیشن کمانڈرز میٹنگ میں جس موقف کا اظہار کیا وہ ہر پاکستانی کا موقف ہے۔

اسحاق ڈار نے کہا کہ سانحہ نومئی میں ملوث عناصر کے لیے کوئی رعایت مناسب نہیں،خیبرپختونخواہ کا بجٹ وفاقی بجٹ سے پہلے منظور ہونا معمول سے ہٹ کر ہے،چار وفاقی اکائیوں کا بجٹ مل کر وفاق کا بجٹ بنتا ہے۔