پاکستان فلم اور ٹی وی کے مایہ ناز اداکار شکیل سپرد خاک

فلم وٹیلی وژن کے مایہ ناز اداکارشکیل کو کراچی میں ڈیفنس فیز8کے قبرستان میں سپردخاک کردیاگیا،نمازجنازہ میں گورنرسندھ کامران ٹیسوری کے علاوہ فنون لطیفہ سے تعلق رکھنے والے افراد بڑی تعداد میں شریک ہوئے۔

جمعرات کی سہ پہر کراچی کے نجی اسپتال میں مختصرعلالت کے بعد انتقال کرجانے والے معروف اداکارشکیل کی نمازجنازہ مسجد سلطان ڈی ایچ میں بعد نمازجمعہ ادا کی گئی،نمازجنازہ میں گورنرسندھ کامران ٹیسوری،پیپلز پارٹی کے رہنما وقارمہدی،اداکاربہروزسبزواری،فیصل قریشی،شہزادرضا،آفتاب عالم،خالدنظامی سمیت مختلف شعبہ ہائے زندگی سے تعلق رکھنے والے افراد،فنکار،دوست احباب اوراہل علاقہ نے شرکت کی۔

گورنرسندھ کا میڈیا سے بات چیت میں کہناتھا کہ بدقسمتی ہے کہ پاکستان میں جب کوئی بڑا نام دنیا سے چلا جاتا ہے،تواس کے بعدہم ان کو پذیرائی دیتے ہیں،یہی عمل ان کی زندگی میں ہونا چاہیے،دوسرے ممالک میں فنکاروں کوبہت عزت دی جاتی ہے،ایسے بے شماراداکارہیں جواپنی اداکاری سے ہماری زندگیوں خوشیوں کا سبب بنتے ہیں۔

گورنرسندھ کا کہناتھا کہ گورنرہاوس میں لیجنڈ فنڈ کے نام سے اکاونٹ تھا،وہ ساڑھے چارسال سے غیرفعال تھا،میں نے چیف سیکریٹری سے بات کی،اب وہ اکاونٹ بحال ہوگیاہے،میری پوری کوشش ہوگی کہ جو فنکاربیمارہے،ان سب کی فنڈ کے ذریعے دادرسی کی جائے۔

دیگرفنکاروں کا اس موقع پرکہناتھا کہ اداکارشکیل کی بلیک اینڈوائٹ ڈرامہ سے رنگین ڈراموں کا سفراورفنکارانہ خدمات کو کبھی بھی فراموش نہیں کیا جاسکتا،ان کی وفات سے پیدا ہونے والا خلا کبھی پر نہیں ہوسکتا،جب بھی فلم اورٹیلی وژن کی تاریخ لکھی جائیگی تووہ اداکار شکیل کے بغیرادھوری تصور کی جائیگی،بعدازاں اداکارشکیل کی تدفین ڈیفنس فیز8کے قبرستان میں کردی گئی۔