فضل الرحمان اور پی ٹی آئی کا ساتھ بیٹھنا سیاسی قیامت کی نشانی ہوگی، فیصل کریم کنڈی

گورنر کے پی کے فیصل کریم کنڈی کہتے ہیں کہ مولانا فضل الرحمن اور پی ٹی آئی ایک ساتھ بیٹھ گئے تو یہ سیاسی قیامت کی نشانی ہو گی، کے پی کے مسائل فلمی ڈائیلاگ سے نہیں مل بیٹھ کر مذاکرات سے حل ہونگے، پی ٹی آئی عمران خان کے متنازعہ ٹویٹ کو اون کرے۔

گورنر خیبرپختونخوا فیصل کریم کنڈی نے لاہور میں سابق وزیر اعلیٰ پنجاب منظور وٹو کی رہائش گاہ پر ان سے ملاقات کی ملاقات کے بعد میڈیا سے گفتگو کرتے ہوئے فیصل کریم کنڈی نے کہا کہ خیبر پختونخوا میں تعلیم کا بجٹ تین ارب روپے رکھا گیا تھا جو کہ آٹے میں نمک کے برابر ہے، ملکی بحرانوں کا حل مذاکرات میں ہے، وزیر اعلیٰ سے کہتا ہوں کہ فلمی ڈائیلاگ بولنے سے کچھ نہیں ملے گا مجھے انکی مجبوری کا احساس ہے تمام مسائل کا حل مل بیٹھ کر مذاکرات کرنے سے ہے

فیصل کریم کنڈی نے کہا کہ یہ سیاسی قیامت ہو گی جب مولانا فضل الرحمن اور پی ٹی آئی ایک ساتھ بیٹھیں گے، پی ٹی آئی کو چاہیے کہ وہ عمران خان کے ٹویٹ کو اون کرے، جو پاکستان کے قانون اور آئین کو مانتا ہے اس سے تو بات ہو سکتی ہے اور جو آئین اور قانون کو نہیں مانتے ان سے بات نہیں ہوگی۔
اس موقع پر سابق وزیر اعلیٰ پنجاب منظور وٹو نے کہا کہ انہوں نے ساری زندگی پیپلزپارٹی کے ساتھ گزاری، کچھ عرصہ بچوں کی وجہ سے ہٹ گیا تھا لیکن اب پھر بچوں کے ساتھ اپنی پارٹی میں موجود ہوں، ان شا اللہ پیپلزپارٹی اس ملک کے تمام مسائل کو حل کرے گی۔