بیرون ملک سفر سے روکنے کی فہرستیں غیرقانونی ہیں، اسلام آباد ہائیکورٹ

فیصل آباد سے رکن قومی اسمبلی رائے حیدر علی کا نام پی این آئی ایل سے نکلوانے کی درخواست پراسلام آباد ہائیکورٹ نے سیکرٹری داخلہ، ایف آئی اے اور ڈی جی پاسپورٹ کو نوٹس جاری کر دیئے۔

چیف جسٹس عامر فاروق نے عدالت میں موجود ڈپٹی اوراسسٹنٹ اٹارنی جنرل روسٹرم پر طلب کر لیا۔

چیف جسٹس عامر فاروق کا برہمی کا اظہار  کرتے ہوئے ریمارکس دیئے کہ کیوں لوگوں کے نام ایسی لسٹوں ڈال رہے ہیں؟ یہ ساری لسٹیں کون بناتا ہے، پتہ نہیں کون یہ سارے نام ڈال رہا ہے، قانون میں ایسی لسٹوں کی کوئی گنجائش نہیں ہے۔

وکیل درخواست گزار نے موقف اپنایا کہ میرے موکل فیصل آباد سے منتخب ایم این اے ہیں۔ میرے موکل نے بیرون ملک جانا تھا لیکن ائیر پورٹ پر روک لیا گیا، بتایا گیا کہ نام پی این آئی ایل میں ہونے کی وجہ سے نہیں جا سکتے۔

اسسٹنٹ اٹارنی جنرل نے بتایا کہ پرانے نام تو بہت سے نکل گئے ہیں، باقی دیکھ لیتے ہیں کون سے رہ گئے ہیں۔

چیف جسٹس نے ریمارکس دیئے کہ بہت سے نکل گئے تو بہت سے ابھی نہیں بھی نکلے، انکو بھی دیکھیں، کبھی کسی کا پاسپورٹ ضبط کر لیتے ہیں کبھی سٹاپ لسٹ میں نام ڈالتے ہیں، ایسے نہ کریں۔ 25 اپریل کی تاریخ دے رہا ہوں، متعلقہ افسر کو بلائیں اور رپورٹ پیش کریں۔