سابق گورنر اسٹیٹ بینک ڈاکٹر شمشاد اختر نگران وزیر خزانہ مقرر

اسٹیٹ بینک آف پاکستان (ایس بی پی) کی سابق گورنر ڈاکٹر شمشاد اختر کو نگراں وزیر خزانہ مقرر کر دیا گیا ہے۔

بزنس ریکارڈر کی رپورٹ کے مطابق یہ پیشرفت ایسے وقت سامنے آئی ہے جب نگران وزیر اعظم انوار الحق کی قیادت میں کابینہ کے اہم ارکان کی تقرری کا عمل وسیع پیمانے پر قیاس آرائیوں کے درمیان جاری ہے۔

اس ہفتے کے شروع میں، ڈاکٹر شمشاد اختر، جو 2018 میں عام انتخابات سے قبل نگراں حکومت میں وزیر خزانہ بھی تھیں، کو صدر ڈاکٹر عارف علوی نے یوم آزادی کے موقع پر نشان امتیاز سے نوازا تھا۔

انہوں نے 2 جنوری 2006 سے تین سالہ مدت کے لیے اسٹیٹ بینک کی گورنر کے طور پر خدمات انجام دیں، ملک کے مرکزی بینک کی سربراہی کرنے والی پہلی خاتون بنیں۔

حیدرآباد میں پیدا ہونے والی ڈاکٹر شمشاد اختر نے اپنی ابتدائی تعلیم کراچی اور اسلام آباد میں حاصل کی۔ انہوں نے 1974 میں پنجاب یونیورسٹی سے بی اے اکنامکس کی ڈگری حاصل کی۔

ڈاکٹر شمشاد اختر نے 1977 میں قائداعظم یونیورسٹی سے معاشیات میں ایم ایس سی کیا، 1980 میں یونیورسٹی آف سسیکس سے ڈیولمینٹ اکنامکس میں ایم اے اور پی ایچ ڈی کی۔

وہ پوسٹ ڈاکٹریٹ فیلوشپ فلبرائٹ اسکالر ہیں اور 1987 میں ہارورڈ یونیورسٹی کے شعبہ اقتصادیات میں وزٹنگ فیلو تھیں۔

وہ پاکستان اسٹاک ایکسچینج (PSX) اور کار انداز پاکستان میں بورڈ آف ڈائریکٹرز کی چیئرپرسن رہ چکی ہیں۔

اہم کردار

ان کی تقرری ایک ایسے وقت میں ہوئی ہے جب پاکستان بین الاقوامی مالیاتی فنڈ (آئی ایم ایف) کے پروگرام میں شامل ہے۔ 3-ارب ڈالر کے نو ماہ کے اسٹینڈ بائی ارینجمنٹ (SBA) کے تحت، ملک کو گزشتہ ماہ تقریباً 1.2 بلین ڈالر کی پہلی قسط موصول ہوئی۔

تاہم، آخری لمحات کے معاہدے کو حاصل کرنے کے باوجود، جس نے ملک کو ممکنہ ڈیفالٹ کو روکنے میں مدد کی، دباؤ برقرار ہے کیونکہ ملک کی مالیاتی ضروریات بلند ہیں۔

ایسے وقت میں، نگراں سیٹ اپ، جو کہ عام طور پر آزادانہ اور منصفانہ انتخابات کرانے کا ذمہ دار ہوتا ہے، پر آئی ایم ایف سے وعدے کی گئی اصلاحات کا اضافی بوجھ ہے۔

اس پس منظر میں نگران وزیر خزانہ کی تقرری کو انتہائی اہم سمجھا جا رہا تھا جس میں اس عہدے کے لیے کئی نام سامنے آئے تھے۔