21 سے 27 مئی تک پنجاب کے میدانی علاقوں میں ہیٹ ویو کے شدید خطرات پر الرٹ جاری

پی ڈی ایم اے پنجاب نے رواں ماہ ہیٹ ویو کا الرٹ جاری کردیا،ترجمان پی ڈی ایم اے کا کہنا ہے کہ مئی میں درجہ حرارت میں 45 ڈگری تک جانے کے امکانات ہیں۔

ترجمان پی ڈی ایم اے نے کہا کہ 21 سے 27 مئی تک پنجاب کے بڑے شہروں اور میدانی علاقوں میں ہیٹ ویو کے شدید خطرات ہیں۔وزیر اعلی پنجاب کی ہدایت کے مطابق ضلعی انتظامیہ کو الرٹ جاری کر دیا ہے۔

ڈی جی پی ڈی ایم اے عرفان علی کاٹھیا نے کہا کہ پنجاب بھر میں ضلعی انتظامیہ کو موسمی صورت حال سے آگاہ کر دیا ہے۔ فصلوں کی باقیات کو ہرگز نہ جلائیں سخت قانونی کارروائی عمل میں لائی جائے گی ۔انتظامیہ عوامی مقامات پر صاف پانی کی فراہمی کو یقینی بنائے۔

ڈی جی پی ڈی ایم اے نے کہا کہ ہسپتالوں اور موبائل ہیلتھ یونٹس میں ہیٹ سٹروک سے متعلق ابتدائی طبی امداد کی فراہمی یقینی بنائی جائے ۔گرمی اور لو کی شدت میں اضافے سے عوام الناس کو بھی محتاط رہنا ہو گا۔ دوپہر کے وقت کام کرنے والے لو سے بچنے کا اہتمام کریں۔ہلکے رنگ کے کپڑے پہنیں سر ڈھانپ کر رکھیں ۔

پی ڈی ایم اے نے عوام سے اپیل کی ہے کہ بچوں بزرگوں کا خاص خیال رکھیں غیر ضروری سفر سے گریز کریں۔