حارث رؤف، فخر زمان آؤٹ، عامر اور عماد وسیم ان، قومی ٹیم کا اعلان چند دن میں متوقع

نیوزی لینڈ کے خلاف ٹی 20 سیریز کے لیے قومی ٹیم کا اعلان کچھ دن میں متوقع ہے، سلیکشن کمیٹی نے اسکواڈ کی تشکیل کے لیے مشاورت شروع کردی۔

ذرائع کے مطابق سلیکشن کمیٹی نے کپتان بابراعظم سے بھی ملاقات کی،،نیوزی لینڈ کے خلاف ہوم سیریز کی وجہ سے 18 کھلاڑیوں کے ناموں کا اعلان کیے جانے کا امکان ہے۔

ذرائع کا کہنا ہے کہ نیوزی لینڈ کے خلاف سیریز کے حوالے سے گزشتہ روز  چیئرمین محسن نقوی سے بھی کپتان اور سلیکٹرز کی ملاقات ہوئی۔

ذرائع نے بتایا کہ حارث روف کو نیوزی لینڈ سیریز کا حصہ نہ بنانے پر غورکیا جا رہا ہے، فاسٹ بولر اپنے کندھے کی انجری کا ری ہیب جاری رکھیں گے،جارحانہ اوپننگ بلےباز فخر زمان نیوزی لینڈ کے خلاف سیریز کا حصہ نہیں ہوں گے۔

ذرائع کا کہنا ہے کہ یو اے ای کی نمائندگی کرنے والے عثمان خان  اور قومی ٹیم میں واپسی کرنے والے عماد وسیم اور محمد عامر کے نام بھی نیوزی لینڈ سیریز کیلئے زیر غور ہیں۔

ذرائع کے مطابق سلیکشن کمیٹی کی مشاورت میں شامل کھلاڑیوں میں کپتان بابر اعظم، محمد رضوان، شاداب خان، صائم ایوب، اسامہ میر کے نام شامل ہیں۔

ذرائع نے مزید کہا کہ دیگر کھلاڑیوں میں شاہین آفریدی، نسیم شاہ، افتخار احمد، اعظم خان، سلمان علی آغا، صاحبزادہ فرحان شامل ہیں۔

اس کے علاوہ زمان خان، وسیم جونیئر، عرفان نیازی اور عباس آفریدی کے نام بھی زیرِ غور ہیں۔نیوزی لینڈ اور پاکستان کے درمیان 5 ٹی ٹوئنٹی میچوں کی سیریز کا آغاز 18 اپریل سے ہوگا۔