خیبر پختو نخوا سے نواز شریف، فضل الرحمان، شیرپاؤ،پرویز خٹک سمیت 12 رجسٹرڈ جماعتوں کے سربراہ الیکشن لڑ رہے ہیں

خیبرپختونخوا سے نواز شریف ، مولانا فضل الرحمن ، آفتاب شیرپاو سمیت 12رجسٹرڈ سیاسی جماعتوں کے قائدین براہ راست انتخابات لڑ رہے ہیں۔

مسلم لیگ ن کے سربراہ نواز شریف خیبرپختونخوا کے ضلع مانسہرہ سے قومی اسمبلی کے امیدوار ہیں اورانہوں نے باقاعدہ مہم شروع کررکھی ہے، نواز شریف کے علاوہ گیارہ دیگر رجسٹرڈ سیاسی جماعتوں کے قائدین بھی خیبرپختونخوا کے مختلف حلقوں سے قومی اسمبلی کے انتخابات لڑ رہے ہیں۔

جماعت اسلامی کے مرکزی امیر سراج الحق لوئر دیر سے اور نیشنل ڈیموکریٹک موومنٹ کے محسن داوڑ شمالی وزیرستان، راہ حق پارٹی کے ابراہیم قاسمی پشاور اور عوامی نیشنل پارٹی کے قائم مقام صدر امیر حیدر ہوتی مردان سے انتخابات لڑ رہے ہیں۔

تحریک انصاف کے چیئرمین بیرسٹر گوہر علی آزاد حیثیت سے بونیر سے قومی اسمبلی کے امیدوار ہیں۔

جے یو آئی کے سربراہ مولانا فضل الرحمن ڈی آئی خان اور قومی وطن پارٹی کے آفتاب احمد خان شیرپاؤ ، پی ٹی آئی پی کے چیئرمین پرویز خٹک عام انتخابات میں ایوان زیریں میں پہنچنے کےلئے میدان میں ہیں۔

اس کے علاوہ غیر معروف جماعتوں عوامی ڈیموکریٹک پارٹی اور عوامی انقلابی لیگ کے قائدین بھی انتخابات میں حصہ لے رہے ہیں۔