ہالی وڈ ہڑتال، اے لسٹ اداکاروں کے ساتھی فنکاروں کے لیے لاکھوں ڈالرز کے عطیات

جارج کلونی اور میریل سٹریپ سمیت ہالی وڈ کے درجنوں اے کیٹگری ستاروں ہالی وڈ ہڑتال کے دوران کام نہ ملنے سے متاثر ہونے والے اداکاروں اور دیگر کے لیے ہالی وڈ یونین کی چیرٹی فاؤنڈیشن کو دس لاکھ ڈالرز یا اس سے زیادہ کا عطیہ کیا ہے۔

ہالی وڈ اداکاروں کی تنظیم سکرین ایکٹر گلڈ اور فلم، ٹی وی کے مصنفین نے معاوضوں پر مئی میں ہڑتال شروع کی تھی جس سے پروڈکشن ہاؤسز میں کام رک گیا ہے۔

اداکاروں اور مصنفین کی ’ دہری ہڑتال‘ 1960 کے بعد پہلی بار ہوئی ہے، اس ہڑتال سے ہالی وڈ اور کیلیفورنیا کی معیشت کو لاکھوں ڈالرز روزانہ کا نقصان ہو رہا ہے، اس کے ساتھ ہڑتال کرنے والوں کو بھی نقصان ہو رہا ہے اور ان کے معاوضوں کی ادائیگی رک گئی ہے۔

ہالی وڈ کی مشہور اے لسٹ شخصیات جارج کلونی، میریل سٹریپ، لیونارڈو ڈی کیپریو، ڈوائن ’ دی راک‘ جانسن، نکول کڈمین، جولیا رابرٹس، اوپرا ونفری اور دیگر نے ہالی وڈ یونین کی چیرٹی فاؤنڈیشن کو ایکٹر سپورٹ فنڈ میں دس دس لاکھ ڈالرز یا اس سے زیادہ کے عطیات دئیے ہیں۔

فاؤنڈیشن کے صدر کورٹنی بی وینس نے بیان میں کہا، "تفریحی صنعت بحران کا شکار ہے اور SAG-AFTRA فاؤنڈیشن اس وقت ہنگامی امداد کے لیے ہماری معمول کی درخواستوں کی تعداد سے 30 گنا زیادہ پر کارروائی کر رہی ہے۔”