کسی ریٹائرڈ جنرل کو مذاکرات کا ٹاسک نہیں دیا، 18 ماہ سے کہہ رہا ہوں بات چیت کے لیے تیار ہوں، عمران خان

عمران خان نے فوجی اسٹیبلشمنٹ سے مذاکرات سے متعلق سوال کے جواب میں کہا ہے کہ تین نام ڈیل کے لیے نہیں بات چیت کے لیے تجویز کیے ہیں اور کسی بھی ریٹائرڈ جرنیل کو بات چیت کا ٹاسک نہیں دیا جبکہ 18 ماہ سے کہہ رہا ہوں کہ بات چیت کے لیے تیارہوں سیاست میں ہمیشہ بات چیت ہوتی ہے۔

اڈیالہ جیل میں میڈیا سے بات چیت کرتے ہوئے عمران خان نے کہا کہ تین جماعتوں کے علاوہ سب سے بات کریں گے، ڈیل وہ کرتا ہے جسے ملک سے باہر جانا ہوتا ہے جیسے زرداری اور نوازشریف گئے، ڈیل جیل سے بچنے کے لیے کی جاتی ہے۔

انہوں نے کہا کہ توشہ خانہ کا یہ نیا کیس لے کر آ رہے ہیں، توشہ خانہ پر یہ چوتھا کیس کر رہے ہیں جو بھی کیس بنانا ہے ایک بار بنا کر لے آئیں، زرداری کا فیک اکاؤنٹ اورنوازشریف کا ایون فیلڈ کے اربوں کے ریفرنس معاف کر دے گئے۔

بانی پی ٹی آئی نے کہا کہ ججز سے درخواست ہے کہ وہ ہمارے کیسز کے فیصلے کریں، سائفر کیس کی سماعت آگے سے اگے چلی جا رہی ہے جو بھی فیصلہ کرنا ہے کریں، عدت کیس میں بھی ڈرامے کیے جا رہے ہیں۔