لاپتہ رہنماؤں اور کارکنوں کی بازیابی کے بغیر الیکشن ہوئے تو شفافیت پر سوال اٹھیں گے، تحریک انصاف کے وزیراعظم، وزرا اعلیٰ کو خطوط

پاکستان تحریک انصاف  نے نگران وزیراعظم اور چیف الیکشن کمشنر سے  اپنے ذمہ داران اور کارکنان کی بازیابی کا مطالبہ کردیا۔ سیکریٹری جنرل عمر ایوب خان نے نگران وزیر اعظم اور چیف الیکشن کمشنر کو الگ الگ خطوط  لکھ دیے ،،خط کی نقول چاروں نگران وزرائے اعلیٰ کو بھی بھجوا دی گئیں۔

عمر ایوب نے خط میں لکھا ہے کہ تحریک انصاف کے رہنما فرخ حبیب، صداقت عباسی، عثمان ڈار، اویس یونس، عرفان سلیم، عبدالکریم خان اور عوامی مسلم لیگ کے سربراہ شیخ رشید کئی روز سے لاپتہ ہیں،ان تمام افراد کی جبری گمشدگیاں آئین میں فراہم کردہ بنیادی حقوق کی صریح خلاف ورزی ہے۔

عمر ایوب خان نے مزید لکھا کہ جب تک ان افراد کو رہا اور جبری گمشدگیوں کے ذمہ داران کو کٹہرے میں نہیں لایا جاتا آئندہ عام انتخابات کی شفافیت پر سوالیہ نشان رہے گا۔

عمر ایوب خان نے امید ظاہر کی کہ جبری طور پر گمشدہ کیے گئے افراد کے معاملے کو سنجیدگی سے دیکھتے ہوئے متعلقہ اداروں کو ان کی فوری بازیابی کے احکامات جاری کیے جائیں گے۔