پاکستان نے روایتی پالیسی تبدیل نہ کی تو معاشی بحران مزید سنگین ہو جائے گا، ورلڈ بینک

ورلڈ بینک نے پاکستان کو ایک بار پھر معاشی بحران کی سنگینی سے متعلق خبردار کر دیا۔

ورلڈ بینک نے پالیسی نوٹ میں کہا کہ  پاکستانی معیشت فیصلہ کن موڑ پر ہے، اگر روایتی پالیسی تبدیل نہ کی گئی تو معاشی بحران مزید سنگین ہو جائے گا، پالیسی تبدیل نہ کرنے کی قیمت بڑے اخراجات اور خطرات کی شکل میں چکانا پڑے گی۔

ورلڈ بینک کے مطابق فیصلہ سازوں کو ترقی کے موجودہ ماڈل کی ناکامی کا احساس ہو جانا چاہیے،موجودہ ماڈل کی ناکامی سے آبادی کا ایک بڑا حصہ پیچھے رہ گیا ہے۔

ورلڈ بینک نے روشن مستقبل کیلئے اصلاحات کے نام سے 8 پالیسی نوٹس پر مبنی تجاویز دی ہیں،ان میں چائلڈ اسٹنٹنگ کے پائیدار حل، پرائیویٹ سیکٹر کو پیداواری اور ماحولیاتی طور پر تبدیل کرنا شامل ہے۔

پاکستان کے تعلیمی بحران کے حل اور حکومتی محصولات کو پائیدار ٹیکس نظام سے مضبوط کرنا بھی شامل ہے،زراعت کے شعبے کو آزاد کرنا، سستی اور پائیدار توانائی کا حصول، سرکاری اخراجات کو معقول بنانا، موسمیاتی لچک کیلئے  اخراجات کی ترجیح اور مؤثر نفاذ کیلئے  اداروں کو مضبوط کرنے کی تجاویز شامل ہیں

پالیسی نوٹس کا مقصد نئے ترقیاتی فریم ورک کو فوری طور پر اپنانے اور اتفاق رائے پیدا کرنا ہے، عالمی بینک کا کہنا ہے کہ وہ دیرینہ پارٹنر کے طور پر پاکستانی معیشت کی بہتری کا خواہاں ہے،پاکستانی معیشت کیلئے پالیسی میں ناگزیر تبدیلیوں کی سفارش کرنا ذمہ داری ہے،   تعلیم، صحت اور پانی تک رسائی کیلئے دولتمندوں سے وسائل کو متحرک کرنے کی ضرورت ہے۔

ورلڈ بینک کا کہنا ہے کہ یہ تبدیلیاں بالآخر سب کو فائدہ پہنچائیں گی جو تیز تر اور جامع ترقی کا باعث بنیں گی۔