اگر مذاکرات ہوں گے تو گھر کے مالک سے ہی ہوں گے، عارف علوی

سابق صدر ڈاکٹر عارف علوی نے کہا ہے کہ اگر مذاکرات ہونگے تو گھر کے مالک سے ہونگے، سائفر کیس میں اچھا فیصلہ آیا ہے اس میں ہے کیا جو حکومت اس پر مزید کھیلنا چاہتی ہے؟

سابق صدر مملکت ڈاکٹر عارف علوی اور اعظم سواتی نے ماڈل ٹاون میں پیر سید حبیب عرفانی چشتی سے ان کے گھر ملاقات کی۔ اس موقع پر میڈیا سے گفتگو میں عارف علوی کا کہنا تھا کہ سائفر کا جو فیصلہ آیا ہے ہم خوش ہیں، یہی فیصلہ آنا چاہیے تھا، سیکشن آفیسر نہیں وزیراعظم ہی طے کرتا ہے کہ اس معاملے کی عوام کو آگاہی دینی ہے یا نہیں۔

عارف علوی کا مزید کہنا تھا کہ احتساب کے معاملے پر ہمت ہار چکا ہوں اشرافیہ احتساب کے معاملے میں سب سے بڑی رکاوٹ ہے،گزشتہ دو سال سے مذاکرات میڈیا کے ذریعے ہورہے ہیں لیکن اب بھی پر امید ہوں۔مذاکرات گھر کے مالک سے ہی ہونگے۔

عارف علوی کا کہنا تھا کہ اگر ماضی میں جہانگیر ترین کو کلین چٹ ملی تو وہ غلط تھا،رجیم چینج سے پاکستان کو کھربوں کا نقصان ہوا۔پاکستان واحد ملک ہے جس میں عوام اتنی بڑی تعداد ایک لیڈر سے محبت کرتی ہے۔