عماد وسیم نے انٹرنیشنل کرکٹ سے ریٹائرمنٹ کا فیصلہ واپس لے لیا

قومی کرکٹ ٹیم کے آل راؤنڈر عماد وسیم نے انٹرنیشنل کرکٹ سے ریٹائرمنٹ واپس لے لی،عماد وسیم نیوزی لینڈ کے خلاف پانچ میچوں کی ٹی ٹوئنٹی سیریز کیلئے دستیاب ہوں گے۔

اسٹار آل راؤنڈر عماد وسیم کو کاکول میں لگنے والے قومی ٹیم کے کیمپ میں بھی شامل کیا جائے گا،عماد وسیم نے اپنی ریٹائرمنٹ واپس لینے کا اعلان سوشل میڈیا کے ذریعے کیا۔

عماد وسیم نے کہا کہ مجھے یہ اعلان کرتے ہوئے خوشی ہو رہی ہے کہ پی سی بی کے حکام سے ملاقات کے بعد، میں نے اپنی ریٹائرمنٹ پر نظر ثانی کی ہے۔

قومی ٹیم کے آل راؤنڈر نے مزید کہا کہ آئی سی سی ٹی ٹوئنٹی ورلڈ کپ 2024 تک ٹی ٹوئنٹی فارمیٹ میں پاکستان کرکٹ کے لیے اپنی دستیابی کا اعلان کرتے ہوئے خوشی محسوس کر رہا ہوں۔

عماد وسیم کا کہنا ہے کہ میں پی سی بی کا مجھ پر اعتماد کرنے پر شکریہ ادا کرنا چاہتا ہوں، میں اپنے ملک کا نام روشن کرنے کے لیے اپنی پوری کوشش کروں گا۔