عمران خان کا کہنا ہے حمودالرحمان کمیشن رپورٹ فرد واحد کے خلاف ہے، انتظار پنجوتھہ

پی ٹی آئی رہنما انتظار پنجھوتھہ کا کہنا ہے کہ بانی نے ایک بار پھر واضح کیا ہے کہ کسی سے کوئی ڈیل نہیں ہو رہی اپنے بیانیئے پر کھڑا ہوں، عمران خان نے حمود الرحمان کمیشن پر بات کرنے کا کہا ہے جبکہ ہمارے مستقبل کا لائحہ عمل اس رپورٹ کے بعد ہوگا۔

اڈیالہ جیل کے باہر پارٹی کے دیگر رہنماؤں کے ہمراہ میڈیا سے گفتگو کرتے ہوئے انتظار پنجھوتھہ کا مزید کہنا تھا کہ ہماری آج عمران خان سے ملاقات ہوئی ہے، انہیں سلمان صفدر نے سائفر فیصلے سے آگاہ کیا۔ عمران خان کا کہنا تھا کہ حمودالرحمان کمیشن رپورٹ صرف فرد واحد کے خلاف چارج شیٹ ہے، 1971 میں فوج بہتر انداز میں لڑی لیکن ایک شخص نے نااہلی کا مظاہرہ کیا۔

انتظار پنجوتھہ نے بتایا کہ بانی پی ٹی آئی نے کہا ملک کی خاطر قید برداشت کررہاہوں، ان شاءاللہ تمام مقدمات میں سرخرو ہوکر نکلوں گا۔ بانی پی ٹی آئی نے یہ بھی کہا کہ محسن نقوی اور ان کی بیگم کا نام دبئی لیکس میں نکلا ہے انہیں دبئی لیکس میں نام پر جواب دینا ہوگا، پاکستان کی معیشیت ایک ایک ڈالر مانگ رہی ہے اور محسن نقوی کیسے ڈالر استعمال کرکے دورے پر دورے کر رہا ہے۔بانی پی ٹی آئی نے پارٹی کے سوشل میڈیا ورکرز کی تعریف کی۔