مہنگائی کی شرح 44.64 فیصد ہوگئی، پیاز کی قیمت بے قابو، 7 دن میں 22 اشیا مہنگی

ملک میں مہنگائی تھمنے کو نہیں آ رہی،مہنگائی کی مجموعی شرح ریکارڈ 44.64 فیصد پر پہنچ گئی،ایک ہفتے کے دوران 22 اشیا مہنگی، 8 کی قیمتوں میں کمی ہوئی۔

ادارہ شماریات نے مہنگائی سے متعلق ہفتہ وار رپورٹ جاری کی ہے جس کے مطابق ملک میں پیاز کی قیمتیں بے قابو ہو گئی ہیں، 230 روپے فی کلو تک قیمت ریکارڈ کی گئی، رواں ہفتے پیاز کی فی کلو قیمت میں 18 روپے 31 پیسے کا اضافہ ہوا۔

رپورٹ کے مطابق ایک ہفتے کے دوران ٹماٹر 10 روپے 78 پیسے فی کلو مہنگے ہوئے،ٹماٹر کی فی کلو قیمت 143 روپے سے بڑھ کر 154 روپے تک پہنچ گئی۔

ادارہ شماریات کے مطابق رواں ہفتے مرغی کی فی کلو قیمت میں 9 روپے 86 پیسے کا اضافہ ہوا، ایک ہفتے کے دوران انڈے فی درجن 7 روپے 87 پیسے مہنگے ہوئے۔

دال ماش کی فی کلو قیمت میں 8 روپے 52 پیسے کا اضافہ ہوا،ایک ہفتے کے دوران لہسن کی فی کلو قیمت 12 روپے 41 پیسے بڑھ گئی،رواں ہفتے کے دوران دال مونگ ،بیف، جلانے کی لکڑی بھی مہنگی ہوئی۔

ایک ہفتے کے دوران آلو،چینی ،پٹرول سمیت 8 اشیا کی قیمتیں کم ہوئیں،رواں ہفتے میں پٹرول کی فی لیٹر قیمت میں 8 روپے تک کمی ہوئی،ایک ہفتے میں چینی کی فی کلو قیمت میں ایک  روپے 32 پیسے کی کمی ہوئی۔

رواں ہفتے بریڈ،تازہ دودھ خشک دودھ سمیت 21 اشیا کے دام مستحکم رہے۔