امریکا کے بااثر سینیٹر چک شومر نے انرجی ڈرنک پرائم کے خلاف تحقیقات کا مطالبہ کردیا

امریکی سینیٹ میں اکثریتی لیڈر چک شومر نے مطالبہ کیا ہے کہ ہائی پروفائل یوٹیوبرز کے ایس آئی اور لوگن پاؤل کی جانب سے مشتہر کی جانے والی انرجی ڈرنک کی تحقیق کی جائے، چک شومر کا کہنا ہے کہ پرائم انرجی ڈرنک میں کیفین کی زیادہ مقدار کے باوجود بچوں کو اس کی ترغیب دی جا رہی ہے۔

پرائم کے ایک کین میں کیفین کی مقدار 200 ملی گرام ہے جو اس کے مدمقابل انرجی ڈرنگ ریڈبل کی نسبت دوگنا ہے۔ پرائم کے کین پر وارننگ بھی درج ہوتی ہے کہ یہ انرجی ڈرنک 18 سال سے کم عمر افراد کے لیے نہیں ہے۔

سینیٹر چک شومر نے نیویارک میں صحافیوں سے بات کرتے ہوئے الزام لگایا کہ پرائم کو اس کے برانڈ مالکان نے کیفین فری ڈرنک کی طرح ڈیزائن اور مارکیٹ کیا ہے، جس کی وجہ سے کچھ والدین انجانے میں اپنے بچوں کو کیفین ملی یہ ڈرنک پلا دیتے ہیں، فوڈ اینڈ ڈرگ ایڈمنسٹریشن ( ایف ڈی اے) پرائم میں کیفین ی مقدار اور سوشل میڈیا پر اس کی مارکیٹنگ کے حوالے سے تحقیق کرنی چاہئے۔

لوگن پاؤل اور کے ایس آئی جن کے یوٹیوب پر 48 ملین فالوورز ہیں، نے 2022 میں کیفین فری پرائم ہائیڈریشن ڈرنک لانچ کی تھی۔ لانچنگ کے ساتھ ہی یہ ڈرنک ۤن لائن مقبولیت کی حدیں پار کر گئی تھی اور پرائم کی خریداری کے لیے لمبی قطاریں لگنے لگی تھیں۔

کیفین ملی پرائم ڈرنک اس سال جنوری میں لانچ کی گئی،اس ڈرنک کو کمپنی کی طرف سے شوگر فری قرار دے کر بیچا جا رہا ہے۔

پرائم کے ہر کین پر درج ہوتا ہے کہ یہ ڈرنک 18 سال سے کم عمر بچوں، کیفین سے الرجک، حاملہ خواتین اور دودوھ پلانے والی خواتین کے لیے نہیں۔