ای سی ایل سے نام خارج کرانے کے لیے شیخ رشید کی پٹیشن پر سیکرٹری داخلہ عدالت طلب

شیخ رشید احمد کی جانب سے اپنا نام ای سی ایل میں سے نکالنے کی درخواست پر لاہور ہائیکورٹ نے کل 6 مارچ کو سیکرٹری داخلہ کو طلب کر لیا۔

جسٹس مرزا وقاص رؤف اور جسٹس صداقت علی خان پر مشتمل لاہور ہائی کورٹ راولپنڈی بنچ کے دو رکنی بنچ نے شیخ رشید احمد کی جانب سے دائر ای سی ایل میں سے نام نکالنے کی درخواست پر سماعت کی۔

نیب کی جانب سے ڈپٹی پراسیکیوٹر عدالت میں پیش ہوئے اور بیان دیا کہ ملک بھر سے نیب کے ریجنل دفاتر سے معلومات لے چکے ہیں ہمیں شیخ رشید کسی مقدمہ میں مطلوب نہیں ہیں، جس پر عدالت نے آئندہ سماعت 6 مارچ  پرسیکرٹری داخلہ کو طلب کر لیا جبکہ سیکرٹری ای سی ایل کو بھی ذاتی حیثیت میں طلب کرنے کا نوٹس جاری کردیا گیا۔

کیس کی سماعت 6 مارچ تک ملتوی کر دی گئی۔سماعت کے دوران شیخ رشید احمد اپنے وکلاء سردار عبدالرازق اور سردار شہباز کے ہمراہ عدالت میں پیش ہوئے۔