اسلام آباد ہائیکورٹ نے 2 مقدمات میں شیرافضل مروت کو گرفتار کرنے سے روک دیا

اسلام آباد ہائی کورٹ نے وکیل شیر افضل مروت کی خیبر پختونخوا میں درج دو مقدمات میں حفاظتی ضمانت منظور کرلی ۔عدالت نے پولیس کو شیر افضل مروت کی گرفتاری سے روک دیا۔

شیرافضل مروت کی 15 روزہ حفاظتی ضمانت منظورکی۔شیر افضل مروت کو پندرہ روز میں ضلع دیر کی متعلقہ عدالت میں پیش ہونے کا حکم  دیدیا۔

جسٹس محسن اختر کیانی نے سماعت کی، وکیل شیر افضل مروت اپنے وکیل نوید حیات ملک کے ساتھ عدالت میں پیش ہوئے۔

شیر افضل مروت کی ضلع دیر میں درج دو مقدمات میں حفاظتی ضمانت کی درخواست پر اعتراضات کے ساتھ سماعت ہوئی۔

عدالت نے شیر افضل مروت کی درخواست پر رجسٹرار آفس کے اعتراضات دور کرتے ہوئے درخواست پر آج ہی ڈائری نمبر لگانے کی ہدایت کی۔

عدالت نے ریمارکس دیئے کہ ڈائری نمبر آج ہی لگ جائے گا آپکے کیس کو آج ہی سنیں گے، عدالت نے درخواست پر ڈائری نمبر لگنے تک سماعت میں وقفہ کردیا۔

خیبرپختونخوا میں کنونشن کرنے پر ضلع دیر میں شیر افضل مروت کے خلاف دو مقدمات درج ہیں۔