اسرائیل فوری جنگ بند کرے، عالمی امن کو خطرہ ہے، اردن

اردن کے وزیر خارجہ ایمن صفادی ہفتے کے روز عمان میں امریکی وزیر خارجہ انٹونی بلنکن کو بتائیں گے کہ اسرائیل کو غزہ پر اپنی جنگ فوری ختم کرنی چاہیے، اسرائیل شہریوں پر بمباری کرکے اور محاصرہ کرکے جنگی جرائم کا ارتکاب کر رہا ہے۔

اردن کی وزارت خارجہ کے بیان میں کہا گیا کہ صفادی غزہ پر اسرائیلی جنگ کو روکنے کی ضرورت پر زور دیں گے اور اسرائیل بین الاقوامی قانون کی پاسداری کرے اور اپنی خلاف ورزیوں کو روکے۔

وزارت خارجہ کے ایک بیان میں، صفادی نے خبردار کیا کہ جنگ کے خاتمے کے لیے اسرائیل کی عدم تیاری خطے کو تیزی سے علاقائی جنگ کی طرف دھکیل رہی ہے جس سے عالمی امن کو خطرہ ہے۔

ایک ماہ سے بھی کم عرصے میں مشرق وسطیٰ کا دورہ کرنے والے  بلنکن نے کہا کہ غزہ کے مستقبل کے بارے میں بات چیت اور اور اس بات کو یقینی بنانے کے طریقے کہ تنازعہ نہ پھیلے، ان کے دورے کے دوران توجہ کا مرکز ہوں گے۔

اس تنازعہ نے اردن میں دیرینہ اندیشوں کو جنم دیا ہے، جو فلسطینی پناہ گزینوں اور ان کی اولادوں کی ایک بڑی آبادی کا گھر ہے، کہ وسیع تر تصادم سے اسرائیل کو فلسطینیوں کو بڑے پیمانے پر مغربی کنارے سے نکالنے کے لیے منتقلی کی پالیسی کو نافذ کرنے کا موقع ملے گا۔

اردن، جو مغربی کنارے کے ساتھ سرحد کا اشتراک کرتا ہے، نے 1948 میں اسرائیل کے قیام کے بعد فرار ہونے والے یا اپنے گھروں سے بے دخل ہونے والے فلسطینیوں کی بڑی تعداد کو جذب کیا۔

شاہ عبداللہ نے بدھ کے روز کہا کہ فلسطینیوں کے خلاف اسرائیل کا "فوجی حل” کامیاب نہیں ہو گا، ایک منصفانہ اور جامع عرب اسرائیل امن کا واحد راستہ دو ریاستی حل کی طرف جانے والے مذاکرات ہیں۔