پی ایس ایل کے دوران ویمن ٹیموں کے نمائشی میچ نہ ہونے کا افسوس ہے، بسمہ معروف

پاکستان ویمن کرکٹ ٹیم کی سابق کپتان بسمہ معروف کا کہنا ہے کہ پاکستان سپر لیگ کے دوران ویمن ٹیموں کے نمائشی میچز نہ ہونے کا افسوس ہے۔

بسمہ معروف نے کنئیرڈ کالج  لاہور کے سالانہ اسپورٹس ڈے میں بیٹی کے ساتھ شرکت کی۔

بسمہ معروف نے کہا کہ ویمن کرکٹرز کے لیے پی ایس ایل کی طرز پر لیگ کا ہونا بہت ضروری ہے، گزشتہ سال پی ایس ایل کے دوران ہمارے نمائشی میچز ہوئے تھے، غیر ملکی کھلاڑیوں نے بھی شرکت کی تھی، رواں سیزن میں ہمارے نمائشی میچز کرانے کا وعدہ کیا گیا تھا لیکن بدقسمتی سے پی ایس ایل کے دوران ہمارے نمائشی میچز نہیں ہو ئے۔

بسمہ معرو نے کہا کہ غیر ملکی کھلاڑیوں کے ساتھ کھیل کر بہت کچھ سیکھنے کا موقع ملتا ہے۔ انہوں نے کہا کہ ڈریسنگ روم شیئر کرنے سے بھی فائدہ ہوتاہے، اسکلز بہتر ہوتی ہیں، یہی وجہ ہے کہ اس کے بعد ہمارے ریزلٹس میں بہتری آئی تھی۔

بسمہ معروف نے کہا کہ آئندہ ماہ ویسٹ انڈیز کے خلاف سیریز بڑی اہمیت کی حامل ہے۔ کوشش ہو گی کہ نیوزی لینڈ کے ٹور میں جو مومنٹم بنا ہوا تھا اس کے مطابق کھیلیں۔

پی ایس ایل کے حوالے سے بسمہ معروف نے کہا کہ تمام ٹیمیں ہماری اپنی ہیں، اسلام آباد یونائیٹڈ کی برانڈ ایمبیسیڈر ہوں اس لیے اسے اسپورٹ کر رہی ہوں۔