جج، جیوری اور پراسیکیوشن سب ایک ہیں، نجم سیٹھی کو کیسے پتہ 5 فروری سے پہلے فیصلہ آئے گا، عمران خان

عمران خان کا کہنا ہے کہ سائفر کیس پوری تیاری سے لڑیں گے، پیر سے لیگل ٹیم بھی آئے گی۔ جج، جیوری اور پراسیکیوشن سب ایک ہیں یہ میچ فکس ہے۔ نجم سیٹھی کو کیسے پتا ہے کہ 5 فروری سے قبل فیصلہ آجائے گا اور مجھے سزا ہو گی ۔

اڈیالہ جیل میں سماعت کے بعد میڈیا سے گفتگو کرتے ہوئے عمران خان نے مزید کہا کہ بد ترین کریک ڈاؤن کے باعث عوام کا آزادی سے رہنے کا بنیادی حق متاثر ہو رہا ہے، ملک میں بنیادی انسانی حقوق کی دھجیاں اڑائی جارہی ہیں۔ میرے وکلا الیکشن لڑ رہے ہیں اس لئے آج عدالت پیش نہیں ہو سکے۔

عمران خان نے کہا کہ عدالت نجم سیٹھی کو بلا کر پوچھے کہ انہیں کہاں سے انفارمیشن ملی، جہاں سے انفارمیشن لیتا ہے یہ بھی سب کو پتہ ہے۔میرا روانہ کی بنیاد پر ٹرائل چل رہا ہے اور دوسری جانب نواز شریف کو ریلیف مل رہا ہے۔

عمران خان نے کہا کہ لیول پلیئنگ فیلڈ کے حوالے سے سب جھوٹ بول رہے ہیں،نواز شریف کی ایک ہی امید ہے کہ اسے ویگو ڈالا الیکشن جتوائے گا لیکن عوام نواز شریف کو نہیں جیتنے دیں گے۔

عمران خان نے کہا کہ ویگو ڈالا کا کمال ہے کہ اس نے سافٹ ویئر اپڈیٹ کر کے خیبر پختونخوا میں دو پارٹیاں بنوا دیں۔

صحافی نے سوال کیا کہ آپ تمام معاملات کے حل کیلئے صدر پاکستان سے بات کیوں نہیں کرتے؟ جس پر بانی پی ٹی آئی نے کہا کہ یہاں صدر پاکستان کی کون سنتا ہے؟