کراچی: پولیس پر پی ٹی آئی کارکنوں کے حملے کا مقدمہ درج، خرم شیر زمان سمیت مقامی قیادت نامزد

کراچی کے علاقے کلفٹن تین تلوار پر اتوار کے روز پولیس اور پی ٹی آئی کارکنان میں تصادم کا مقدمہ فرئیر تھانے میں درج کر لیا گیا۔ مقدمہ سرکار کی مدعیت میں ہنگامہ آرائی ،توڑ پھوڑ اور اقدام  قتل اور دہشت گردی سمیت دیگر دفعات شامل کی گئی ہیں۔۔مقدمے میں خرم شیر زمان ،فہیم خان ،سعید آفریدی اور عدیل احمد کو نامزد کیا گیا ہے۔

ایف آئی آر کے مطابق لیڈران نے کارکنان کو اشتعال دلوایا،کارکنان نے موقعے پر موجود پولیس پارٹی پر حملہ کیا،پولیس کے پاس موجود اینٹی رائٹس کی کٹ چھین لی گئی، کارکان نے اسلحے کے زور پر پولیس سے سامان چھینا۔

 ایف آئی آر کے متن کے مطابق پی ٹی آئی قیادت اور کارکنان سے علاقے میں خوف پھیلا،لیڈی کانسٹیبل اور 2 ایس ایچ اوزسمیت 8  پولیس اہلکار زخمی ہوئے۔ شہر کے مختلف علاقوں سے ریلیوں کی شکل میں تین تلوار پر کارکنان جمع ہوئے، ریلی میں شریک افراد کے پاس جلسے کے لئے قانونی  اجازت نہیں تھی، موقعے پر موجود پولیس افسران و اہلکاروں  نے کارکنان کو سمجھایا لیکن تین تلوار کے اطراف ٹریفک جام کی گئی۔

مقدمے میں75 سے زائد افراد  نامزد کئے گئے ہیں، ڈی آئی جی ساؤتھ اسد رضا کا کہنا ہے کہ  15افراد کو گرفتار کیا گیا ہے،دیگر افراد کی گرفتاری کے لئے کارروائی کی جارہی ہے۔