کراچی: بھانجے کو بائیک پر سیر کرانے والے کو لوگوں نے بچے کے اغوا کا الزام لگا کر پیٹ ڈالا، آگ لگانے کی کوشش

کراچی میں بچے کے اغوا کے الزام میں شہریوں کے تشدد کا نشانہ بننے والا بچے کا ماموں نکلا ، واقعہ ناظم آباد نمبر چار میں پیش آیا جہاں کامران نامی شخص اپنے بھانجے کو موٹر سائیکل پر قریبی بازار لے جارہا تھا ، محلے داروں نے اغوا کار ہونے کے شبہے میں کامران کو پکڑا اور شدید تشدد کا نشانہ بنایا.

پولیس کے مطابق کچھ افراد نے کامران کو زندہ جلانے کی بھی کوشش کی تاہم پولیس نے موقع پر پہنچ کر زخمی کامران کو عوام کے چنگل سے نکال کر تھانے منتقل کیا, بعد ازاں بچے کی والدہ تھانے پہنچی اور پولیس کو بیان دیا کہ کامران اسکا سگا بھائی ہے اور بھانجے کو بازار سے کھانے پینے کی اشیا دلوانے لے جارہا تھا جس پر اہل علاقہ نے غلط فہمی کی بنیاد پر تشدد کیا۔

پولیس نے بچے کو والدہ کے حوالے کردیا اور کامران کو بھی چھوڑ دیا گیا، پولیس کے مطابق غلط الزام لگا کر تشدد کرنے والے افراد کے خلاف کاروائی کی جائے گی۔