کراچی: خیبرپختونخوا سے اسلحہ آن لائن منگوا کر فروخت کرنے والے گروہ کے دو کارندے گرفتار

خیبرپختونخوا  سے آن لائن اسلحہ کراچی منگوا کر فروخت کرنے والے گروہ کے دو کارندے کاؤنٹر ٹیررزم ڈیپارٹمنٹ (سی ٹی ڈی) نے گرفتار  کر لیے۔ گرفتاریاں دو مختلف کاروائیوں میں کی گئیں۔

پہلی کاروائی مبینہ ٹائون میں کی گئی جہاں پولیس نے بلال نامی ملزم کو گرفتار کرکے اسکے قبضے سے 4 نائن ایم ایم پستول برآمد کرلیے، دوسری کاروائی میں سمن آباد سے ایک ملزم حمزہ کو گرفتار کرکے اسکے قبضے سے 2 نائن ایم ایم پستول برآمد کیے گئے۔

ملزمان نے پستول درہ آدم خیل سے آن لائن کراچی منگوائے تھے، ملزمان نے دوران تفتیش بتایا کہ کراچی سے جرائم پیشہ افراد اور اسلحہ کے شوقین لوگ اسلحہ آن لائن بک کرواتے ہیں اور انہیں اسلحہ کراچی پہنچانے پر فی ہتھیار 10 ہزار روپے کمیشن ملتا ہے۔

ملزمان نے بتایا کہ وہ پبلک بسوں اور نجی گاڑیوں کے زریعہ اسلحہ کراچی سمیت مختلف شہروں میں منتقل کرتے ہیں ، ملزمان کے خلاف مقدمہ درج کرکے مزید تفتیش شروع کردی گئی ہے۔