لاہور: ایس ایچ او وحدت کالونی سمیت 7 اہلکاروں کے خلاف اغوا برائے تاوان کا مقدمہ درج

اغوا برائے تاوان کی وارداتوں میں لاہور پولیس کے اہلکار ملوث ہونے کا انکشاف ہوا ہے۔تھانہ فیروز والہ میں ایس ایچ او وحدت کالونی افضال،سب انسپکٹر عادل،علی بٹ اور اکرام سمیت سات پولیس اہلکاروں کے خلاف مقدمہ درج کر لیا گیا۔

مقدمہ گجرانوالہ کے رہائشی محمد الیاس کی مدعیت میں درج کیا گیا،شہری نے الزام عائد کیا کہ ایس ایچ او افضال، سب انسپکٹرعادل نے دیگر اہلکاروں کے ہمراہ اغوا کیا اور  نامعلوم جگہ پر لے گئے۔

ایف آئی آر کے متن کے مطابق الیاس نے بتایا کہ پولیس اہلکارگن پوائنٹ پر گاڑی میں بٹھا کر نامعلوم جگہ لے جایا گیا اور ایک کروڑ کا مطالبہ کیا۔

مدعی مقدمہ کا دعویٰ ہے کہ  گھر فون کر کے 12 لاکھ روپے کی رقم منگوائی اور جان خلاصی کروائی۔

مدعی مقدمہ کے مطابق ایس ایچ او وحدت کالونی افضال، سب انسپکٹر عادل اور سب انسپکٹر اکرام نے کار خاص علی بٹ اور دیگر کانسٹیبل اہلکاروں کیساتھ شہری کو اغوا کیا۔

ذرائع کا کہنا ہے کہ پولیس افسران نے انکوائری شروع کر دی ہے۔