لاہور ہائیکورٹ نے ریٹرننگ افسروں کے تقرر پر لارجر بینچ بنا دیا، چیف الیکشن کمشنر کی چیف جسٹس سپریم کورٹ سے ملاقات

چیف الیکشن کمشنر سکندر سلطان راجا نے چیف جسٹس پاکستان قاضی فائزعیسی سے ملاقات کی اور عام انتخابات کے لیے بیوروکریسی سے ریٹرننگ افسر لیے جانے پر لاہور ہائی کورٹ کے حکم امتناع سے آگاہ کیا۔

ذرائع کا کہنا ہے کہ چیف الیکشن کمشنر سکندر سلطان راجا سپریم کورٹ آئے اور چیف جسٹس قاضی فائزعیسیٰ سے ملاقات کی۔

ذائع کے مطابق اس ملاقات میں جسٹس سردار طارق مسعود اور جسٹس اعجاز الاحسن کے علاوہ اٹارنی جنرل بھی شریک تھی۔

ذرائع نے بتایا کہ چیف الیکشن کمشنر نے ججز کو لاہور ہائی کورٹ کے حکم امتناع سے آگاہ کیا۔

ذرائع کے مطابق چیف جسٹس نے چیف الیکشن کمشنر سے ملاقات سے پہلے دو سینئر ججز سے ملاقات اور مشاورت کی۔

دوسری طرف لاہور ہائی کورٹ نے عام انتخابات کے لیے بیورو کریسی کی خدمات کے خلاف درخواست پر لارجر بینچ تشکیل دے دیا۔

جسٹس علی باقر نجفی کی سربراہی میں 5 رکنی لارجر بینچ 18 دسمبر کو سماعت کرے گا۔جسٹس شہرام سرور، جسٹس سرفراز ڈوگر بینچ میں شامل ہیں۔جسٹس سلطان تنویر اور جسٹس جواد حسن بھی بینچ کا حصہ ہوں گے۔

واضح رہے کہ سنگل بینچ نے انتخابات کے لیے بیوروکریسی کی خدمات لینے کا الیکشن کمیشن کا نوٹیفکیشن معطل کیا تھا ۔

سنگل بینچ نے درخواست پر لارجر بینچ تشکیل دینے کی سفارش کی تھی۔