لاہور: لڑکی کیوں پیدا کی؟ خاتون پر خاوند اور سسرالیوں کا تشدد، 3 ملزم گرفتار

دوبارہ لڑکی پیدا کیوں کی؟ خاوند، دیور اور سسر نے خاتون کو بدترین تشدد کا نشانہ بنا ڈالا،وزیرِ اعلیٰ پنجاب کے نوٹس پر لاہور انویسٹی گیشن پولیس غازی آباد نے خاتون مقدس یاسین پر بدترین تشدد کرنیوالے شوہر، دیور اور سسر کو گرفتار کر لیا۔

ایس ایس پی انویسٹی گیشن ڈاکٹر انوش مسعود چوہدری نے پولیس ٹیم کو ملزمان کی فوری گرفتاری کا ٹاسک دیا تھا،  مقدس یاسین کی ایک بیٹی پہلے تھی اس کا شوہر حافظ مزمل لڑکے کا خواہشمند تھا۔

انویسٹی گیشن انچارج منصب خان کا کہنا ہے کہ دوبارہ لڑکی پیدا ہونے پر خاوند حافظ مزمل نے بھائی تجمل اور والد اسلم کے ساتھ مل کر اپنی بیوی کو بدترین تشدد کا نشانہ بنایا،خاتون نے ملزمان کے خلاف تھانہ غازی آباد میں مقدمہ درج کروایا تھا۔

ایس ایس پی انویسٹی گیشن انوش مسعود چوہدری کا کہنا ہے کہ خواتین پر ظلم و تشدد کسی صورت برداشت نہیں کیا جائے گا،خواتین کو ہراساں و تشدد کا نشانہ بنانے والے کسی رعایت کے مستحق نہیں۔

ڈاکٹر انوش مسعود چوہدری نے ملزمان کی گرفتاری پر پولیس ٹیم کو شاباش دی۔